काठमाडौं । रूसी राष्ट्रपति भ्लादिमिर पुटिनले युक्रेनविरुद्धको युद्धमा कुनै देशले हस्तक्षेप गरेमा आक्रमण गर्ने धम्की दिएका छन् । रुसका राष्ट्रपति भ्लादिमिर पुटिनले बुधबार रुससँग युद्धमा हस्तक्षेप गर्ने निर्णय गर्ने देशहरूमाथि तत्काल आक्रमण गर्ने सबै साधनहरू भएको बताए ।

रुसले अमेरिकालाई युक्रेनमा हतियार पठाउन बन्द गर्न आग्रह गरेको छ । उनले पश्चिमी मुलुकबाट हतियारको ठूलो डेलिभरीले युद्धलाई थप उक्साएको बताए । बुधबार सेन्ट पिट्सबर्गमा सांसदहरुलाई सम्बोधन गर्दै पुटिनले पश्चिमा राष्ट्रहरु मिलेर रुसलाई विभिन्न टुक्रामा विभाजन गर्न चाहेको बताए । पुटिनले पश्चिमी देशहरूले युक्रेनलाई रुससँग युद्धमा धकेलेको आरोप पनि लगाएका छन् ।

पुटिनले भने ‘यदि कसैले युक्रेन विरुद्धको हाम्रो चलिरहेको युद्धमा हस्तक्षेप गर्न चाहन्छ र रुसलाई कुनै खतरा पैदा गर्छ भने त्यो हामीलाई अस्वीकार्य छ। यदि यो भयो भने हामी ती देशहरू विरुद्ध बदला लिनेछौं। हामीसँग यो गर्न पर्याप्त हतियार छ। हामीमा घमण्ड छैन तर आवश्यक परे सबैलाई थाहा हुने गरी प्रयोग गर्नेछौँ ।’

रसियाले २४ फेब्रुअरीमा युक्रेनमा आक्रमण सुरु गरेको थियो । दुई महिनापछि, रुसले धेरै युक्रेनी सहरहरूलाई भग्नावशेषमा परिणत गरेको छ। एक अनुमान अनुसार हालसम्म ५० लाखभन्दा बढी मानिसले युक्रेन छोडिसकेका छन् । रुसले युक्रेनमा आफ्नो कारबाहीलाई विशेष अपरेशनको रूपमा वर्णन गर्दछ, जबकि युक्रेन र पश्चिमी देशहरूले यसलाई पुटिनको युद्धको लागि गलत बहाना भनेका छन्।

अर्कोतर्फ, ह्वाइट हाउसबाट अमेरिकी राष्ट्रपति जो बाइडेनले रुस र युक्रेनबीच चलिरहेको युद्धबारे बिहीबार (अप्रिल २८) एक वक्तव्य जारी गर्ने बताइएको छ ।