काठमाडौं । मंगलबार, बेलायतका एक अधिकारीले भनेका छन् कि चीनले आफ्नो फ्लीटमा ३० भन्दा बढी बेलायती फाइटरजेट पाइलट र हेलिकप्टर पाइलटहरू भर्ती गरेको छ। ती सबैलाई चिनियाँ सैन्य पाइलटहरूलाई तालिम दिन भर्ती गरिएको हो।

ती सबैलाई लगभग २ लाख ४० हजार पाउण्ड (साढे ३ करोड नेपाली रूपैयाँ भन्दा बढी) को वार्षिक तलबमा भर्ती गरिएको ती अधिकारीले बताए । अहिले यी सबै पाइलट जनमुक्ति सेनाको तालिम शिविरमा छन् ।

बेलायतको न्यूज च्यानल स्काई न्यूजका अनुसार बेलायतको रोयल एयर फोर्सका एक सेवानिवृत्त वरिष्ठ अधिकारीले यसलाई खतरनाक भनेका छन् । अर्का अधिकारीले खुलासा गरेका छन् कि चीनले पश्चिमी लडाकु विमान र हेलिकप्टरलाई कसरी हराउने भनेर चिनियाँ सेनालाई सिकाउन दर्जनौं पूर्व ब्रिटिश सैन्य पाइलटहरू भर्ती गरेको छ।

अधिकारीहरूले भनेका छन् कि करिब ३० फाइटर जेट पाइलट र केही हेलिकप्टर पाइलटहरू हाल चीनको पिपुल्स लिबरेशन आर्मीको प्रशिक्षण शिविरमा छन्। बेलायती अधिकारीहरूले भने कि चीनले अमेरिकाको नेतृत्वमा पाँचौं पुस्ताको लडाकु विमान एफ-३५ मा प्रशिक्षण लिएका पूर्व पाइलटहरूलाई पनि भर्ती गर्ने प्रयास गरेको छ । एफ-३५ लडाकु जेटको मूल्य १०० मिलियन पाउण्ड भन्दा बढी छ। यो विमान अमेरिका र बेलायतले संयुक्त रुपमा विकास गरेको हो ।

बेलायती अधिकारीले भने कि चीनले धेरै सेवारत र सेवानिवृत्त पूर्व सैन्य पाइलटहरू र आरएएफ, शाही नौसेना र ब्रिटिश सेनाका विशेषज्ञहरूका साथै अन्य धेरै पश्चिमी देशका सैन्य कर्मचारीहरू भर्ती गर्न खोजिरहेको छ। यसका लागि चीनले करिब २ लाख ४० हजार पाउण्ड वार्षिक तलब उपलब्ध गराउँदै आएको उनले बताए ।

बेलायतको रक्षा मन्त्रालयको गुप्तचर एजेन्सीले मंगलबार एक अलर्ट जारी गरी सेवारत र पूर्व सैन्य कर्मचारीहरूलाई यस्ता कदमहरू विरुद्ध चेतावनी दिएको छ। अधिकारीहरूले भने कि हामी चीनको भर्ती योजनालाई लिएर चिन्तित छौं। यो बेलायत र पश्चिमा राष्ट्रहरुको हितका लागि खतरा हो ।

बेलायती अधिकारीहरूले भनेका छन् कि यस भर्ती योजना अन्तर्गत अनुभवी पाइलटहरूको सहयोगमा चीनले बेलायती र नेटो देशका लडाकु विमानहरू जस्तै टाइफुन, टोर्नाडो र ह्यारियर जम्प जेटहरूको क्षमता बारे सचेत हुन चाहन्छ। यी पाइलटहरूको सहयोगमा उसले आफ्ना पाइलटलाई यस्ता लडाकु विमानसँग कसरी प्रतिस्पर्धा गर्ने भन्ने प्रशिक्षण दिनेछ । ती पाइलटको सहयोगमा चीनले वायुसेनाको रणनीति र क्षमता विकासमा सहयोग लिइरहेको अधिकारीले बताए ।

स्रोतका अनुसार चीनले यो भर्ती प्रक्रिया पूरा गर्न दक्षिण अफ्रिकी कम्पनीलाई तेस्रो पक्षको रूपमा प्रयोग गरेको थियो। दक्षिण अफ्रिकाको तेस्रो पक्ष कम्पनी टेस्ट फ्लाइङ एकेडेमी सेवानिवृत्त सैनिकहरूसँग प्रत्यक्ष सम्पर्कमा थियो। चीनले यही कम्पनीमार्फत भर्ना प्रक्रिया पूरा गरेको थियो। यो आरोपमा कम्पनीको हालसम्म कुनै प्रतिक्रिया आएको छैन ।