काठमाडौं । इरानले युक्रेनमा ड्रोन हमला गर्न रुसलाई सघाउन क्रिमियामा आफ्ना सैन्य विज्ञहरू तैनाथ गरेको अमेरिकाले जनाएको छ । अमेरिकी अधिकारीले इरानका प्रशिक्षक र प्राविधिक सहयोगीलाई क्रिमियामा पठाइएको बताए ।

सोमबार नै युक्रेनको राजधानी किभमा ‘कामिकाजी’ ड्रोनबाट आक्रमण भएको थियो । यी ड्रोन रुसले तैनाथ गरेको तर इरानले बनाएको मानिन्छ । बेलायतले ड्रोन आपूर्ति गर्ने कम्पनी र केही व्यक्तिमाथि प्रतिबन्धको घोषणा गरेको थियो।

ह्वाइट हाउसका राष्ट्रिय सुरक्षाका प्रवक्ता जोन किर्बीले सञ्चारमाध्यमलाई भने, “हामीले क्रिमियामा इरानी सेनाहरू उपस्थित रहेको र यी कारबाहीमा रुसलाई सहयोग गरिरहेको थाहा पाएका छौं।”

“केही इरानीहरूले प्राविधिक सहयोग गरिरहेका छन् र रसियाले यी ड्रोनहरू युक्रेनमा पठाउँदैछ,” उनले भने। “तेहरान अब प्रत्यक्ष युद्धमा संलग्न छ र युक्रेनको जनता र नागरिक पूर्वाधारमा प्रभाव पार्न हतियार प्रयोग गरिरहेको छ,” किर्बीले भने।

अमेरिकाले युक्रेनका जनता विरुद्ध इरानले यी हतियारको प्रयोगलाई उजागर गर्न, रोक्न र प्रतिरोध गर्न “सबै प्रयास गर्ने” बताएको छ । सोमबारको आक्रमणपछि युक्रेनले यो इरानी ड्रोनले गरेको बताएको छ । यिनीहरूलाई ‘कामिकाजी’ ड्रोन भनिन्छ।

रुसले युक्रेनको महत्वपूर्ण पूर्वाधारलाई लक्षित गर्न हालैका दिनहरूमा ड्रोन र मिसाइलहरू प्रयोग गरेको छ। गत हप्ता सोमबारदेखि भएको आक्रमणमा युक्रेनको करिब एक तिहाइ विद्युत केन्द्रहरू ध्वस्त भएका छन्।

फलस्वरूप, बिहीबार पहिलो पटक युक्रेनमा बिजुलीको प्रयोग सीमित गरिएको छ।