काठमाडौं । सिद्धु मूसेवाला हत्याकाण्डका मुख्य अभियुक्तलाई प्रहरी हिरासतबाट भगाउने मुख्य योजनाकारलाई पञ्जाब प्रहरीले पक्राउ गरेको छ । पटियाला रेन्जका आईजी मुखविन्दर सिंह छिनाले दीपक टिनुका भाइ चिरागलाई पक्राउ गरिएको बताए ।

उनले दीपक टिनुलाई नेपाल हुँदै देशबाट निकाल्ने योजना रहेको बताए । उनलाई प्रहरी हिरासतबाट फरार गराउने मुख्य योजनाकार चिराग हुन् । समाचार एजेन्सी पीटीआईका अनुसार प्रहरीले दीपक टिनुबाट भाग्न प्रयोग गरिएको दुईवटा पेस्तोल र एउटा कार बरामद गरेको छ।

मानसामा बर्खास्त गरिएका प्रहरी जवान प्रीतपाल सिंहको घर बाहिरबाट दीपक टिनु र उनकी प्रेमिकालाई चिराग नै लिन आएको प्रहरीले जनाएको छ । चिरागले दुवैलाई राजस्थान र अन्य ठाउँमा लुकाएर लगेका थिए ।

पञ्जाबी गायक सिद्धु मुसेवालाको हत्याका अभियुक्त दीपक टिनु अक्टोबर १ राति मानसा प्रहरीको अपराध अनुसन्धान एजेन्सी (सिआइए) को हिरासतबाट फरार भएका थिए ।

मानसा सीआईए इन्चार्ज प्रीतपाल सिंहले दिपक टिनुलाई आफ्नी कथित प्रेमिकासँग पुनर्मिलन गराउनका लागि आफ्नो गाडीमा सरकारी निवासमा लगेका थिए ।

लगत्तै आरोपी दीपक टिनु कथित प्रेमिकासँगै फरार भएका थिए । घटनापछि प्रहरीले प्रितपाल सिंहलाई नियन्त्रणमा लिएको छ ।

दीपक टिनुलाई दिल्ली पुलिसले अक्टोबर १९ मा राजस्थानको अजमेरबाट पक्राउ गरेको थियो भने उनकी प्रेमिकालाई पञ्जाब प्रहरीले यसअघि नै पक्राउ गरिसकेको छ।