काठमाडौं । पाकिस्तानका अर्थमन्त्री इशाक डारले रुसबाट तेल खरिद गर्ने विषयमा ठूलो बयान दिएका छन् । इशाक डारले अमेरिकाले पाकिस्तानलाई रुसबाट तेल खरिद गर्नबाट रोक्न नसक्ने भन्दै भारतले पनि रुसबाट तेल खरिद गरिरहेको बताएका छन् । भारतले रुसबाट जुन शर्तमा तेल खरिद गरिरहेको छ, त्यही शर्तमा पाकिस्तानले पनि छिट्टै तेल किन्न थाल्ने अर्थमन्त्री इशाक डारले बताए ।

इशाक डारले दुबईमा पाकिस्तान मुस्लिम लिग-नवाजका कार्यकर्ताहरूलाई सम्बोधन गर्दै यस्तो बताएका हुन्। पाकिस्तानी अर्थमन्त्रीले सम्बोधनमा भने कि उनी गत महिना अमेरिका गएका थिए, जहाँ उनले धेरै महत्त्वपूर्ण व्यक्तिहरूलाई भेटेका थिए। यस क्रममा उनले रुसबाट तेल किन्ने मुद्दा पनि उठाएका थिए ।

इशाक डारले अमेरिकामा भएको कुराकानीका क्रममा पाकिस्तानलाई रुसबाट तेल खरिद गर्नबाट रोक्न नसकिने स्पष्ट रुपमा भनेका थिए, किनभने हाम्रो छिमेकी राष्ट्र भारतले पनि रुसबाट तेल आपूर्ति गरिरहेको छ ।

इशाक डारले थपे कि, अमेरिकी अधिकारीहरूले उनलाई रूसी तेलको मूल्य निर्धारण गर्न जी-७ प्लेटफर्म तयार गर्न लागेको बताए। पाकिस्तानका अर्थमन्त्री इशाक डारले सम्बोधनका क्रममा भारतले जुन शर्तमा रुसी तेल खरिद गरिरहेको छ, त्यही शर्तमा छिट्टै पाकिस्तानले पनि तेल किन्न थाल्ने बताए ।

अर्कोतर्फ दुबई भ्रमणको सन्दर्भमा पाकिस्तानका अर्थमन्त्री इशाक डारले श्रमिकहरुलाई पाकिस्तानको साउदी अरब, चीन र युएईसँग बलियो सम्बन्ध रहेको बताए । उनले युएईका उच्च अधिकारीसँग पनि महत्वपूर्ण भेटघाट गरेका छन् । यी सबै बैठकको नतिजा साउदी अरेबियाले पाकिस्तानको ग्वादर क्षेत्रमा तेल रिफाइनरी खोल्ने तयारी गरिरहेको उनले बताए ।

तेल प्रशोधन केन्द्रको यो आयोजना सन् २०१५ अक्टोबरमा सुरु भएको तर राजनीतिक संकटका कारण बीचमै रोकिएको र अब फेरि सुरु हुन लागेको उनले बताए ।

तर इशाक डारले पहिलो पटक यस्तो बयान दिएका होइनन् । गत महिना इशाक डार अमेरिका भ्रमणमा रहेका बेला अमेरिकी विदेश मन्त्रालयका अधिकारीहरुसँग भेटेर रुसबाट तेल खरिद गर्ने विषयमा छलफल भएको थियो । इशाक डारले अबको केही महिनामा शहबाज सरिफ सरकारले रुसबाट तेल किन्न पाकिस्तानको पक्षमा महत्वपूर्ण कदम चाल्ने बताएका थिए ।

इशाक डारले भारतमा उर्जाको उच्च माग रहेको भन्दै रुसबाट तेल लगायतका धेरै उर्जा स्रोतहरु खरिद गरिरहेको बताएका थिए । इशाक डारले भारतले यसो गर्नु कुनै पनि प्रतिबन्धको उल्लङ्घन नभएको बताएका थिए।

त्यसबेला पनि भारतको उदाहरण दिँदै पाकिस्तानका अर्थमन्त्रीले युक्रेनसँग युद्ध भए पनि भारतले रुसबाट तेल किनिरहेको बताएका थिए । यस्तो अवस्थामा पाकिस्तानलाई रुसबाट तेल खरिद गर्नबाट रोक्न सकिँदैन ।

तेलको मूल्यमा रुसको मनमानी रोक्नको लागि जि-७ प्लेटफर्म सिर्जना गरिएको थाहा छ। जसले गर्दा रुसबाट तेल किन्ने मूल्य निर्धारण गर्न सकिन्छ।

केही महिनादेखि युक्रेन र रुसबीच युद्ध चलिरहेको छ । अमेरिकालगायत धेरै पश्चिमी देशहरूले रुसमाथि आर्थिक प्रतिबन्ध लगाएका छन् । यस्तो अवस्थामा भारतले रुसबाट तेल किन्न नहुने भन्दै पहिलो दबाब दिएको थियो । तर, भारतले कुनै पनि दबाब मानेन र रुसबाट तेल खरिद गर्न जारी राख्यो ।

विदेशमन्त्री एस जयशंकरले यस मामिलामा आफ्नो अडान स्पष्ट गर्दै जुनसुकै सम्झौताले भारतका नागरिकलाई फाइदा पुग्छ, भारतले त्यहाँबाट खरिद गरिरहने बताएको थियो।