काठमाडौं । टर्कीले सिरियाको सिमानामा रहेको कुर्द लडाकुको स्थानमा हवाई आक्रमण गरेको छ । यी हवाई हमलाहरू सिरियाको कोबाने सहर लगायत उत्तरी सिरियाका अन्य सहरहरूमा भएका छन्।

सिरियन अब्जर्भेटरी फर ह्युमन राइट्स पर्यवेक्षकले कुर्द नेतृत्वको सिरियन डेमोक्रेटिक फोर्स (एसडीएफ) का कम्तीमा छ जना सदस्य र छ जना सरकार समर्थक सैनिक मारिएको बताएको छ।

नोभेम्बर १३ मा टर्कीको ठूलो सहर इस्तानबुलको व्यस्त किनमेल क्षेत्रमा बम विष्फोट भएको थियो । विस्फोटमा छ जनाको ज्यान गएको थियो भने ८० भन्दा बढी घाइते भएका थिए ।

टर्कीका अधिकारीहरूले यसका लागि कुर्दिश आतंकवादी समूह पीकेकेलाई दोष दिएका छन्। टर्कीका अधिकारीहरूले बम राखेको आशंकामा पक्राउ परेकी एक सिरियाली महिलाले आफूलाई पीकेके लडाकूहरूले तालिम दिएको बताएको बताए।

तर, पीकेकेले बम विष्फोटमा कुनै पनि भूमिका रहेको अस्वीकार गर्दै आएको छ ।