सुपर मादी हाइड्रोपावरले ३१ लाख ५० हजार कित्ता आइपिओ जारी गर्दै
काठमाडौँ। सुपर मादी हाइड्रोपावरले ३१ लाख ५० हजार कित्ता आइपिओ मंसिर २० गतेदेखि जारी गर्ने भएको छ। कम्पनीले आयोजना प्रभावित स्थानीय र वैदेशिक रोजगारीमा रहेका नेपालीहरुका लागि आईपीओ जारी गर्न लागेको हो।
कम्पनीले स्थानीयका लागि जारी गर्न लागेको आइपिओमध्ये आयोजना अति प्रभावित क्षेत्र कास्की जिल्लाको मादी गाउँपालिकाको वडा नं. १ र २ का स्थानीय बासिन्दाहरुको लागि ३ लाख १५ हजार कित्ता छुट्याएको छ। भने,आयोजना प्रभावित क्षेत्र कास्की जिल्लाको मादी गाउँपालिकाका अन्य वडा नं ३, ४, ५, ६, ७, ८, ९, १०, ११ र १२ तथा पोखरा महानगरपालिका वडा नं. २६, २७ र २८ का स्थानीय बासिन्दाहरुका लागि ७ लाख ३५ हजार कित्ता निष्कासन गर्ने भएको छ।
यस आइपिओमा स्थानीयले पुस ५ गतेसम्म आईपीओमा आवेदन दिन पाउनेछन्। तोकिएको समय भित्र सबै सेयर बिक्री नभएको खण्डमा पुस २० गतेसम्म आवेदन दिन पाउनेछन्। यस आइपिओमा न्यूनतम १० कित्ता र अधिकतममा ५० हजार कित्ताका लागि आवेदन दिन पाउनेछन्।
यस आइपिओको बिक्री प्रबन्धकमा काम सानिमा क्यापिटलले गर्नेछ। स्थानीयके यस आइपिओमा एनसीसी बैंक, कुमारी बैंक, माछापुच्छ्रे बैंक, सानिमा बैंकका तोकिएका शाखा कार्यालय र आयोजना स्थलबाट आवेदन दिन सक्नेछन्।
यसैगरी वैदेशिक रोजगारमा रहेकाहरुले आईपीओमा पुस ५ गतेसम्म आवेदन दिन सक्नेछन्। उनीहरुले न्यूनतममा १० कित्ता र अधिकतममा ५० हजार कित्ताका लागि आवेदन दिन पाउनेछन्। वैदेशिक रोजगारमा रहेका नेपालीले भने आस्बा सेवामा सहभागी बैंक तथा वित्तीय संस्था र तिनका तोकिएको शाखा कार्यालयबाट सी–आस्बा प्रणालीबाट आवेदन दिन सक्नेछन्।
Facebook Comment