काठमाडौं । मङ्गलबार ब्ल्याक सीको हवाई क्षेत्रमा अमेरिकी ड्रोन खसेपछि रुसले बुधबार यस ड्रोनको अवशेष हटाउने प्रयास गर्ने जनाएको छ ।

रुसको सुरक्षा परिषद्का सचिव निकोलाई पात्रुसेभले आफ्नो देशले डुबेको ड्रोन खोज्ने प्रयास गरिरहेको सरकारी च्यानल रोसिया-१ टिभीमा पुष्टि गरेका छन् ।

उनले भने, “मलाई थाहा छैन हामी यसलाई फेला पार्न सक्षम हुनेछौं कि सक्दैनौं, तर प्रयास हुनेछ।”

यद्यपि, अमेरिकी संयुक्त चिफ अफ स्टाफका प्रमुख जनरल मार्क मिलिका अनुसार यो ड्रोनलाई पुनः प्राप्त गर्न निकै कठिन हुनेछ।

समाचार एजेन्सी रोयटर्सका अनुसार जनरल मिलीले भने, “यो सायद धेरै गहिरो छ, त्यसैले प्राविधिक रूपमा कुनै पनि रिकभरी अपरेशन चलाउन धेरै गाह्रो हुनेछ।”

अमेरिकाका अनुसार जब रुसी जेटले ड्रोनको प्रोपेलर काटिदिए, तब क्षतिग्रस्त ड्रोन “उड्न योग्य” रहन सक्दैन।

जनरल मिलीले रुसले यो ड्रोन बरामद गरेमा अमेरिकाको संवेदनशील गुप्तचर सूचनालाई कुनै हानी नहुने बताएका छन् ।

उनले भनेका छन् कि अमेरिकाले यस प्रकारको जानकारी सुरक्षित गर्न आवश्यक कदम चालेको छ।