काठमाडौं । पाकिस्तान तहरीक–ए–इन्साफ (पीटीआई) का प्रमुख इमरान खानले इस्लामावादको अदालततर्फ जाँदै गर्दा आफ्नो लश्कर दुर्घटनामा परेको बताएका छन् ।

उनले सामाजिक सञ्जालमा एक मिनेट १३ सेकेण्डको भिडियो पोस्ट गर्दै भनेका छन्, ‘दुर्भाग्यवश दुर्घटना भयो र म ढिलो भएँ।

उनले वर्तमान सरकारले आफूमाथि आक्रमण गरेको आरोप लगाए र भने, “उनीहरू मलाई गिरफ्तार गर्न चाहन्छन्। उनीहरू लन्डन योजनामा ​​काम गरिरहेका छन्, जुन नवाज शरीफको योजना हो। उनीहरू चाहन्छन् कि म चुनावमा भाग लिन नपाउँ।”

आफू पक्राउ हुने थाहा पाए पनि अदालतमा हाजिर हुन लागेको उनले दाबी गरे ।

महासचिव असद उमरले लाहोर उच्च न्यायालयको आदेश अनुसार इमरान खान अदालतमा उपस्थित हुन लागेको तर उनलाई अदालत पुग्नबाट रोकिएको बताए ।

पार्टीले अर्को ट्विटमा भनेको छ कि अदालत जाने बाटोहरु सिल गरिएको छ, उनीहरुका वकिलहरुलाई समेत परिसरमा प्रवेश गर्नबाट रोक लगाइएको छ ।

तोशखाना मुद्दामा इमरान खान आज अदालतमा हाजिर हुनुपर्नेछ ।

इमरान खानविरुद्ध ८३ एफआइआर दर्ता भएका छन् । अहिलेको कोलाहल तोषखाना र महिला न्यायाधीशको अपमान दुईवटा मुद्दालाई लिएर भइरहेको छ ।

यी दुवैमा उनीविरुद्ध गैर जमानती वारेन्ट जारी गरिएको थियो । तर, अब तोशाखान मुद्दामा वारेन्ट मात्र बाँकी छ ।

बिहीबार दिउँसो न्यायाधीश जेवा चौधरीको इजलासले वारेन्ट खारेज गरेको हो । उनलाई सोमबार अदालतमा बोलाइएको छ ।

यो मुद्दाको सुनुवाइ गर्ने ठाउँ पनि परिवर्तन भएको छ । अब सुनुवाई इस्लामाबादको सत्र अदालतको सट्टा न्यायिक कम्प्लेक्समा हुनेछ।

तेहरिक–ए–इन्साफ पार्टीका प्रमुखले आफ्नो सुरक्षाको बारेमा चिन्ता व्यक्त गरेका थिए । यसैलाई उद्धृत गर्दै उनले अदालतमा उपस्थित हुन नसक्ने बताए । यसैलाई मध्यनजर गर्दै सुनुवाइको स्थान परिवर्तन गरिएको हो ।

यसैबीच, इमरान खानलाई शुक्रबार लाहोर उच्च अदालतले नौ मुद्दामा सुरक्षात्मक जमानत पनि दिएको छ।