काठमाडौं । संयुक्त अरब इमिरेट्सको दुबई सहरमा रहेका भारतीय परिवारकी १२ वर्षीया छोरीले आफ्नो कमाइको पैसाले आइफोन १४ किनेर सबैलाई चकित पारिन् । सातौं कक्षाकी छात्रा बियान्का जेमी वरियावाले आफूले बनाएको ब्रेड विद्यालयमा बेचेर ६ हप्तामा ३ हजार दिराम कमाइन् । उनको ब्रेड स्कूलका बालबालिका र शिक्षकहरूले मन पराउँथे।

वास्तवमा, बियान्कालाई आईफोन धेरै मन पर्छ र उनी चाहन्थिन् कि उनीसँग पनि यो फोन होस्। तर उनका आमाबुवासँग छोरीको लागि आईफोन किन्न पर्याप्त पैसा थिएन। फेब्रुअरीमा एक दिन बियान्काकी आमा जेमिनी वरियावाले उनलाई खाजाको लागि प्याक गरिएको ब्रेड दिइन् जुन उनले आफ्नै हातले बनाएकी थिइन्। रोटी बियान्काका साथीहरूलाई धेरै मन पर्यो।

बियान्काले खलीज टाइम्सलाई भनिन्, ‘मेरा साथीहरूलाई ब्रेडको स्वाद र पफिनेस मन पर्यो। उनीहरूलाई ब्रेड यति स्वादिष्ट लाग्यो कि उनीहरूले मलाई अर्को दिन फेरि यस्तै केहि ल्याउन भने। यसपछि बियान्काको दिमागमा एउटा विचार आयो कि किन आफैंले ब्रेड बनाएर स्कुलमा नबेच्ने ?

बियान्काका आमाबुवा दुवै बेकर हुन् र दुवैले दुबईको पाँचतारे होटलमा काम गरेका छन्। बियान्का उनीहरूलाई ब्रेड बनाउँदै गरेको हेर्दै हुर्केकी छिन् र उनी पनि आफ्ना आमाबाबुलाई बेकिंगमा सहयोग गर्छिन्।

जब उनका आमाबुवालाई छोरीको आइडिया थाहा भयो, तब उनीहरू निकै खुसी भए । उनका बुबा जेमीभाई वरियावाले उनलाई १०० दिराम दिए र यही पैसाबाट आफ्नो करियर सुरु गर्न भने । बियान्काकी आमाले उनलाई विभिन्न प्रकारको ब्रेड बनाउन सिकाइन् ।

जेमिनी भन्छिन्, ‘पाँच वर्षकी हुँदादेखि नै पिज्जा पार्लरमा बेकिंगमा सहयोग गरिरहेकी छिन् । उनलाई सानैदेखि बेकिंगमा रुचि थियो ।’

बियान्का स्कुलमा पहिलो दिन मात्र दुईवटा ब्रेड बेच्दा अलिकति निराश भइन् । तर उनले हार मानिनन् र विद्यालयमा ब्रेड बेच्ने काम जारी राखिन् । उनी चारवटा ब्रेड १० दिराममा बेच्ने गर्थिन्। चाँडै विद्यालयमा बियान्काको ब्रेडको लोकप्रियता बढ्न थाल्यो र हरेक दिन उनले ६० वटा ब्रेडको अर्डर पाउन थालिन् ।

बियान्का बताउँछिन्, ‘मैले सादा ब्रेड मात्र बेचेको छैन, तर मैले सादा सफ्ट रोल, ओरियोस, उबे (फिलिपिन्सको पेस्ट्री), चिज, टर्की सलामी विथ चिज, र चिकन फ्र्याङ्कजस्ता चीजहरू पनि बेचेको छु। यी सबै मेरा शिक्षक र सहपाठीहरूले मन पराए। ब्रेड सबैलाई मनपर्छ र मेरा आमाबाबुको गोप्य तरिकाको कारण मेरो व्यवसाय द्रुत रूपमा बढ्यो।

गृहकार्य सकिएपछि साँझ बेकिङ गर्ने गरेको उनले बताइन् । बियान्का आफूले पाएको अर्डर अनुसार बेक गर्थिन् । मार्चको दोस्रो सातासम्म बियान्काले ३,००० दिराम बचत गरि आइफोन १४ को लागि अर्डर गरिन्।

स्कुल पढ्दा बियान्कालाई ब्रेड बेच्न सजिलो थिएन। विद्यालयका धेरै विद्यार्थीले उनको खिल्ली उडाए ।

उनी भन्छिन्, ‘केही विद्यार्थीले मलाई घृणाले हेरे । उनीहरु आपसमा कुरा गर्थे कि ब्रेड बेच्नुको सट्टा सिधै आमाबुवासँग आईफोन किन माग्दिनन् । उनीहरूले हाम्रो आर्थिक अवस्थामाथि प्रश्न उठाए ।

बियान्काले यी आलोचनाहरूलाई बेवास्ता गरिन् र आफ्ना साथीहरू र शिक्षकहरूको प्रेरणाले अगाडि बढिरहिन् र अन्ततः उनले आफ्नो लक्ष्य हासिल गरिन्। उनी पढाइपछि आफ्नै बेकरी र कफी पसल खोल्न चाहन्छिन् ।