काठमाडौं । पाकिस्तानमा भएको एउटा अनौठो घटना अहिले निकै चर्चामा रहेको छ। पूर्वप्रधानमन्त्री इमरान खानको समर्थनमा भएको प्रदर्शनका क्रममा प्रहरीले दुवै हात नभएका एक व्यक्तिलाई गिरफ्तार गर्‍यो। उनीमाथि प्रहरीमाथि ढुङ्गा हान्नुका साथै लाठी प्रहार गरेको आरोप लगाइएको थियो। तर, मामला अदालत पुगेपछि भने सिङ्गो घटनाक्रम नै उल्टिएको छ।

पाकिस्तानको राजधानी इस्लामाबादमा गत अगस्ट ५ मा ‘पाकिस्तान तहरीक-ए-इन्साफ’ का संस्थापक इमरान खानको रिहाइको माग गर्दै प्रदर्शन भएको थियो। सो क्रममा प्रहरीले कैयौँ मानिसहरूलाई नियन्त्रणमा लिएको थियो। तीमध्ये लतिफ उल्लाह सदोजई नाम गरेका एक व्यक्ति पनि थिए, जसका दुवै हात छैनन्। पछि अदालतले उनलाई सो मामिलाबाट पूर्ण रूपमा डिस्चार्ज (सफाइ) दिएको छ।

‘इन्डिपेन्डेन्ट उर्दू’को रिपोर्टअनुसार थाना करपामा दर्ता भएको प्राथमिकी (FIR) मा प्रहरीले लतिफ उल्लाह सदोजईमाथि अगस्ट ५ को प्रदर्शनका क्रममा प्रहरीमाथि ढुङ्गा प्रहार गरेको र लाठी बर्साएको आरोप लगाएको थियो। प्रहरीले उनलाई पक्राउ गरेपछि तीन दिनको शारीरिक हिरासत (फिजिकल रिमान्ड) समेत लिएको थियो।

मामला त्यतिबेला अनौठो बन्यो, जब उनलाई ड्युटी मजिस्ट्रेट रिजवान-उद-दीनको अदालतमा पेस गरियो। उनका वकिल सरदार मारुफ एडभोकेटले अदालतसमक्ष भने कि उनका क्लाइन्टका दुवै हात नै छैनन्। यस्तो अवस्थामा उनले प्रहरीमाथि कसरी ढुङ्गा प्रहार गर्न र लाठीले आक्रमण गर्न सक्छन्? सुनुवाइका क्रममा अदालतभित्रै लतिफ उल्लाहका दुवै हातको शारीरिक परीक्षण गरिएको थियो।

लतिफ उल्लाह सदोजईले इन्डिपेन्डेन्ट उर्दूसँग कुराकानी गर्दै भने कि उनी अगस्ट ५ को प्रदर्शनपछि त लागङ फर्किँदै थिए। सोही क्रममा प्रहरीले उनको गाडी रोकेर तलासी लियो र गाडीमा सवार अन्य मानिसहरूसँगै उनलाई पनि पक्राउ गर्‍यो। उनले आफ्ना दुवै हात नभएको अवस्थामा आफूले कसरी ढुङ्गामुढा गर्न सक्थे भनेर प्रश्न गरे। उनका अनुसार उनले प्रहरीलाई पटक-पटक आफ्नो शारीरिक अवस्थाबारे जानकारी गराएका थिए, तर प्रहरीले उनको कुरा सुनेन।

अदालतमा शारीरिक परीक्षणपछि लतिफ उल्लाहका दुवै हात नभएको पुष्टि भयो। त्यसपछि अदालतले उनलाई मुद्दाबाट सफाइ दिँदै रिहा गर्ने आदेश दियो।

दुवै हात नभएका व्यक्तिमाथि प्रहरीले ढुङ्गामुढा र लाठी प्रहारको आरोप लगाएका कारण यो घटना अहिले सामाजिक सञ्जाल र सञ्चारमाध्यममा तीव्र रूपमा चर्चाको विषय बनेको छ।