काठमाडौं । कतारले आगामी २४ घण्टामा युद्धविरामको समय सुरू भएको घोषणा गरिने जनाएको छ । यो युद्धविराम चार दिनका लागि लागू हुने र ‘अझै लम्बिन सक्ने’ पनि बताइएको छ।

हमासले कब्जामा लिएका इजरायली बन्धकहरूलाई लिएर बहुप्रतिक्षित सम्झौता भएको छ। प्रारम्भिक चरणमा चार दिनसम्मको अस्थायी युद्धविरामको बदलामा महिला र बालबालिकासहित ५० बन्धकहरूलाई रिहा गरिनेछ।

यद्यपी यी बन्धकहरूलाई कहिले रिहा गर्ने र अस्थायी युद्धविराम कहिलेदेखि लागू हुने भन्नेबारे कुनै जानकारी दिइएको छैन।

यसबाहेक, प्रत्येक थप १० जना बन्धकहरूलाई रिहा गरेपछि थप एक दिन युद्धविराम हुने पनि सम्झौतामा भनिएको छ।

यस सम्झौताका सम्बन्धमा हमासले एक विज्ञप्ति जारी गर्दै ५० इजरायली बन्धकको बदलामा इजरायली जेलमा रहेका १५० प्यालेस्टिनी महिला र बालबालिकालाई रिहा गरिने जनाएको छ ।

यस सम्झौता अन्तर्गत मानवीय सहायता, अत्यावश्यक औषधि र इन्धनले भरिएका सयौं ट्रक गाजा प्रवेश गर्नेछन्। हामासको विज्ञप्तिमा इजरायलले चार दिने युद्धविरामको अवधिमा कुनै पनि आक्रमण नगर्ने र कसैलाई पनि गिरफ्तार नगर्ने बताइएको छ।