काठमाडौं । आर्थिक संकटको सामना गरिरहेको मध्य अमेरिकी देश एल साल्भाडोरको संसदले सरकारी, सामाजिक र आर्थिक विकास कार्यक्रमका लागि बिटक्वाइन दान गर्ने विदेशीहरूलाई नागरिकता दिने कानुनलाई अनुमोदन गरेको छ।

विदेशी नागरिकलाई नागरिकता दिने यो कानुन राष्ट्रपति नयिब बुकेलेको न्यू आइडियाज पार्टीको समर्थनमा संसदबाट पारित भएको हो । यो ऐन आगामी दिनमा लागु हुनेछ ।

नयिब बुकेले आगामी फेब्रुअरी ४ मा हुने निर्वाचनमा फेरि उम्मेदवार हुन गइरहेका छन् । तर, त्यहाँको संविधानले उनलाई स्पष्ट रूपमा चुनाव लड्ने अनुमति दिएको छैन ।

नागरिकता दिने कानुनमा परिवर्तन गर्दा राष्ट्रपतिले आफ्नो विकासका धेरै महत्वपूर्ण परियोजनाको उल्लेख गरेका छन् । उनले एल साल्भाडोरको आर्थिक, सामाजिक र सांस्कृतिक विकासमा सहयोग गर्न चाहने र यसका लागि बिटक्वाइनमार्फत चन्दा दिने विदेशीलाई एल साल्भाडोरको नागरिकता दिने कुरा गरेका छन् ।

यो नयाँ कानूनले एल साल्भाडोरको नागरिकता प्राप्त गर्न कम्तीमा ५ वर्षको लागि कुनै पनि गैर-स्पेनिश भाषी देशको स्थायी बासिन्दा हुनु आवश्यक पर्ने प्रावधानलाई हटाउँछ। एल साल्भाडोरले सन् २०२१ मा बिटक्वाइनलाई राष्ट्रिय मुद्रा बनाएको थियो । तर, देश भरमा यसको प्रयोग धेरै सीमित थियो।

नगद संकटसँग संघर्ष गरिरहेको बुकेले सरकारले देशको सुस्त आर्थिक वृद्धि दरलाई गति दिन नयाँ वित्तीय कार्यक्रमलाई ध्यानमा राख्दै अन्तर्राष्ट्रिय मुद्रा कोषसँग सम्झौतामा काम गरिरहेको छ। आईएमएफले एल साल्भाडोरले बिटक्वाइनलाई कानुनी मुद्रा बनाउने खतराबारे चेतावनी दिएको छ।

२०२१ मा एल साल्भाडोरको सर्वोच्च अदालतले बुकेले फेरि राष्ट्रपतिको चुनावमा उम्मेदवार हुन सक्ने फैसला गरेको थियो। सर्वोच्च अदालतको यो निर्णयको अमेरिकालगायत धेरै अन्तर्राष्ट्रिय मञ्चमा विरोध भएको थियो । एल साल्भाडोरको सर्वोच्च अदालतका सदस्यहरू सरकार आफैंबाट नियुक्त हुन्छन्।