काठमाडौं । अमेरिकी सरकारले निखिल गुप्ताका वकिललाई उनीविरुद्धका प्रमाण दिन आपत्ति जनाएको छ । निखिल गुप्तालाई न्यूयोर्क अदालतमा पेश नगरेसम्म यस मुद्दामा प्रतिरक्षा सामग्री अर्थात् प्रमाण उनका वकिललाई नदिने अमेरिकाले बताएको छ ।

निखिल गुप्ता अमेरिकामा एक खालिस्तानी नेताको हत्याको असफल षड्यन्त्रको मुद्दामा मुख्य अभियुक्त हुन् र हाल चेक गणतन्त्रको जेलमा छन्।

५२ वर्षीय भारतीय नागरिक गुप्ताका वकिलले अमेरिकी सरकारले निखिल गुप्तामाथि लागेको आरोपको प्रमाण उपलब्ध गराउन न्युयोर्क अदालतमा अपिल गरेका थिए । तर अहिले सरकारले त्यसो गर्न अस्वीकार गरेको छ ।

गत वर्ष नोभेम्बरमा अमेरिकाले भारतीय नागरिक निखिल गुप्ताले न्यूयोर्कमा पृथकतावादी नेता गुरपतवन्त सिंह पन्नुको हत्याका लागि एक व्यक्तिलाई एक लाख डलर (करिब ८३ लाख रुपैयाँ) को ठेक्का दिएको दाबी गरेको थियो। अमेरिकी अदालतमा पेश गरिएका कागजातमा ‘निखिल गुप्ताले भारत सरकारका एक कर्मचारीबाट निर्देशन पाएको’ दाबी गरिएको छ ।

निखिल गुप्ता गत वर्ष जुन ३० देखि चेक रिपब्लिकको जेलमा छन् । अमेरिकी सरकारले उनको सुपुर्दगीका लागि पहल गरिरहेको छ ।

भारतले यो आरोपको छानबिन गर्न उच्चस्तरीय समिति गठन गरेको छ, जसले अमेरिकाबाट प्राप्त प्रमाणका आधारमा यस विषयमा अनुसन्धान गरिरहेको छ ।