काठमाडौं । दक्षिण कोरियाका राष्ट्रपति युन सुक–योलको पार्टीले संसदमा ल्याइएको महाभियोग प्रस्तावको कडा विरोध गर्ने बताएको छ ।

पार्टीका नेता हान डोङ-हुनले आफ्नो पार्टीले संसदमा प्रस्तावलाई रोक्न आफ्ना सहयोगीहरूलाई एकजुट गर्ने प्रयास गर्ने बताएका छन्।

हान डोङ-हुनले भने, “पार्टी नेताको हैसियतमा म यस महाभियोगलाई पारित हुनबाट रोक्न काम गर्नेछु, किनकि यसले अभूतपूर्व अराजकता र हाम्रा जनता र समर्थकहरूलाई हानि पुर्‍याउन सक्छ।”

तर हानले महाभियोगको विरोध गर्नु भनेको मार्शल ल लागू गर्ने राष्ट्रपतिको प्रयासको समर्थन नभएको स्पष्ट पारे।

उनले भने, ‘राष्ट्रपतिलगायत असंवैधानिक मार्सल लमार्फत राष्ट्रलाई अस्थिर बनाउने र जनतालाई आतंकित पार्ने जिम्मेवार व्यक्तिलाई जवाफदेही बनाउनुपर्छ ।’

राष्ट्रपतिलाई सत्ताबाट हटाउन विपक्षी दललाई राष्ट्रपति युन सुक-योलको पार्टीका आठ सदस्यको समर्थन चाहिन्छ।