काठमाडौं । बुटवल उपमहानगरपालिका-१० रामनगरस्थित सडकमा मंगलबार बिहान बसको ठक्करबाट मोटरसाइकलमा सवार महिलाको मृत्यु भएको छ।

मृत्यु हुनेमा बुटवल उपमहानगरपालिका-११ देवीनगर बस्ने ५८ वर्षीया जमुना पुन रहेकी छन्। दुर्घटनामा गम्भीर घाइते भएकी उनको लुम्बिनी प्रादेशिक अस्पतालमा उपचारका क्रममा मृत्यु भएको प्रहरीले जनाएको छ।

बुटवलबाट बर्दघाटतर्फ जाँदै गरेको लु.२ ख ७०४९ नम्बरको बसले लु.४४ प ९२९४ नम्बरको मोटरसाइकललाई ठक्कर दिएको थियो।

सोही दुर्घटनामा घाइते भएका मोटरसाइकल चालकको लुम्बिनी प्रादेशिक अस्पतालमै उपचार भइरहेको छ। प्रहरीले बस चालकलाई नियन्त्रणमा लिई दुर्घटनाको सम्बन्धमा आवश्यक अनुसन्धान गरिरहेको छ।