काठमाडौं । आइपीएल टिम पञ्जाब किंग्सकी सह-मालिक तथा बलिउड अभिनेत्री प्रीति जिन्टाले आफ्ना सह-निर्देशक मोहित बर्मन र नेस वाडिया विरुद्ध चण्डीगढ अदालतमा मुद्दा दायर गरेकी छिन्।

तीनै जना केपीएच ड्रीम क्रिकेट प्राइभेट लिमिटेडका निर्देशक हुन् । इन्डियन प्रिमियर लिग (आईपीएल) टोली पञ्जाब किंग्सको स्वामित्व यही कम्पनीसँग छ। यो कम्पनी २००८ मा केपीएच ड्रीम क्रिकेट प्राइभेट लिमिटेडको नाममा स्थापित भएको थियो। मोहित बर्मन र नेस वाडिया प्रीति जिन्टा जस्तै पञ्जाब किंग्स टोलीका सह-मालिक हुन्।

जिन्टाले अप्रिल २१ मा आयोजित असाधारण साधारण सभाको वैधतालाई चुनौती दिएकी छिन्। कम्पनी ऐन, २०१३ र अन्य सचिवीय नियमहरू अन्तर्गत उचित प्रक्रियाहरू पालना नगरी बैठक आयोजना गरिएको उनको दाबी छ। प्रीतिका अनुसार उनले अप्रिल १० मा इमेलमार्फत बैठकमाथि आपत्ति जनाएकी थिइन्, तर उनको आपत्तिलाई बेवास्ता गरियो। उनले आरोप लगाएअनुसार यो बैठक मोहित बर्मन र नेस वाडियाको समर्थनमा भएको थियो।

जिन्टा र अर्का निर्देशक करण पल बैठकमा उपस्थित भए पनि उनीहरूले अदालतलाई यो बैठकलाई गैरकानूनी घोषणा गर्न आग्रह गरेका छन्। उनीहरूको मुख्य चिन्ताको विषय भनेको बैठकको क्रममा मुनिष खन्नालाई निर्देशकको रूपमा नियुक्ति गरिनु हो । यो नियुक्तिको प्रिती र पलले विरोध गरेका छन् ।

आफ्नो मुद्दामा प्रितीले अदालतलाई खन्नालाई निर्देशकको रूपमा काम गर्नबाट रोक्न र कम्पनीलाई त्यो बैठकमा लिइएको कुनै पनि निर्णय लागू गर्नबाट रोक्न पनि आग्रह गरेकी छिन्। पञ्जाब किंग्स टिम पहिले किंग्स इलेभेन पञ्जाबको नामले चिनिन्थ्यो। यसलाई २००८ मा मोहित बर्मन, नेस वाडिया, प्रीति जिन्टा र करण पलले लगभग ३०४ करोड रुपैयाँ (लगभग ७६ मिलियन डलर) मा किनेका थिए।

त्यतिबेला यो भन्दा सस्तोमा केवल दुई टोलीहरू किनिएका थिए । ती थिए राजस्थान रोयल्स (२६८ करोड रुपैयाँ) र कोलकाता नाइट राइडर्स (३०० करोड रुपैयाँ)। पञ्जाबको टोलीले अहिलेसम्म एक पटक मात्र आईपीएलको फाइनलमा स्थान बनाएको छ। टोलीले २०२१ को सिजन अघि आफ्नो नाम परिवर्तन गरेको थियो ।

पञ्जाब किंग्सले आईपीएल २०२५ मा उत्कृष्ट प्रदर्शन गर्दै ११ वर्षपछि प्लेअफमा स्थान बनाएको छ। टोलीले अहिलेसम्म १२ मध्ये ८ खेल जितेको छ र १७ अंक र +०.३८९ को नेट रन रेटका साथ तेस्रो स्थानमा छ। श्रेयस अय्यरको कप्तानी र रिकी पोन्टिङको प्रशिक्षणमा टोलीले आक्रामक ब्याटिङ र सन्तुलित बलिङका साथ धेरै खेल जितेको छ।