काठमाडौं । नेपाल शिक्षक संघ केन्द्रीय कार्यसमितिले आदर्श शिक्षक बचत तथा ऋण सहकारी कैलालीलाई सम्मानित गरेको छ। आज काठमाडौंमा आयोजित विशेष समारोहबीच उक्त सहकारीलाई सम्मानित गरिएको हो।

शिक्षक संघ कैलाली मातहतमा रहेको उक्त सहकारीले शिक्षकहरूको हकहितका लागि उत्कृष्ट काम गर्दै आएको भन्दै सम्मानित गरिएको शिक्षक संघका महासचिव ज्ञानेन्द्रबहादुर रावलले जानकारी दिए।

‘नेपाल शिक्षक संघ संघीय कार्यसमितिको निर्णयानुसार आफ्ना सदस्यहरूको आर्थिक विकासमा सहयोग पुर्‍याउँदै संगठनलाई मजबुत बनाउनका लागि चलाइएको शिक्षक सहकारी अभियानलाई आत्मसात् गर्दै त्यस जिल्लामा सफल र प्रभावकारी रुपबाट शिक्षक सहकारी सञ्चालन र सोमार्फत आफ्ना सदस्यहरूको हित हुने महान कार्य गरेवापत २५औं संघीय प्रतिनिधिसभाका अवसरमा कदर पत्र प्रदान गरिएको छ,’ सम्मान पत्रमा भनिएको छ।

शिक्षक सहकारीका अध्यक्ष नवराज ओझाले यो सम्मानले आफूहरूलाई थप प्रेरणाा प्रदान गरेको बताए। ‘राम्रो काम गर्दा केन्द्रबाट पनि मूल्यांकन हुँदो रहेछ। हाम्रो सहकारीलाई सम्मान गरेकोमा शिक्षक संघ केन्द्रीय समितिप्रति आभार व्यक्त गर्दछौं। यो सम्मानले हामीलाई थप प्रेरणा प्रदान गरेको छ,’ उनले भने।

यस्तै आफूहरूलाई शिक्षक संघ कैलाली र कैलाली जिल्ला अध्यक्ष तेजबहादुर सिंहले पनि प्रेरणा दिने गरेको ओझाको भनाइ छ। सबैको सहयोगका कारण नै आफूहरूले शिक्षक सहकारीलाई आजको अवस्थामा पुर्‍याउन सकेको उनले बताए।