काठमाडाैं। नेपाली सेनाले विपद् प्रतिकार्य र पूर्वतयारीलाई सहज बनाउने उद्देश्यका साथ सम्भावित जोखिम नक्सांकन गर्ने प्रयोजनका लागि तथ्यांक अद्यावधिक गरिएको स्पष्ट पारेको छ।

विशेषगरी मनसुनको समयमा हुनसक्ने जनधनको क्षति न्यूनीकरणका लागि सेनाका स्थानीय युनिटहरूले आ-आफ्नो जिम्मेवारी क्षेत्रभित्र पर्ने जोखिमपूर्ण स्थानहरूको पहिचान गरी तथ्यांक संकलन गरेका हुन्।

सैनिक जनसम्पर्क तथा सूचना निर्देशनालयले एक विज्ञप्ति जारी गर्दै यो कार्य नियमित तयारीको हिस्सा भएको र यसले विपद्को समयमा छिटो र छरितो ढंगले उद्धार तथा राहत कार्य सञ्चालन गर्न मद्दत पुग्ने स्पष्ट पारेको छ।

बर्सातको समयमा नेपालका विभिन्न भू-भागमा बाढी, पहिरो, डुबान र नदी कटानको उच्च जोखिम रहने हुनाले सेनाले सरोकारवाला निकायहरूसँगको समन्वयमा पूर्वतयारीका योजनाहरू बुनिरहेको छ।

विगतका वर्षहरूमा घटेका विपद्का घटना र तिनले पुर्‍याएको क्षतिको विश्लेषण गर्दै सेनाले यस पटक अझ बढी प्रभावकारी रूपमा जनशक्ति र स्रोतसाधन परिचालन गर्ने रणनीति लिएको छ। तथ्यांक अद्यावधिक गर्ने क्रममा स्थानीय भूगोल, बस्तीको अवस्था र जोखिमका कारकहरूको मसिनो अध्ययन गरिएको सेनाको भनाइ छ।

विपद् व्यवस्थापनलाई थप प्रभावकारी बनाउन नेपाली सेनाले अन्य सुरक्षा निकाय र स्थानीय प्रशासनसँगको सहकार्यलाई पनि उत्तिकै महत्व दिएको छ।

सेनाको यो कदम केवल तथ्यांक संकलनमा मात्र सीमित नभई सम्भावित संकटको समयमा मानवीय र भौतिक क्षतिलाई न्यूनतम विन्दुमा झार्ने ठोस प्रयास भएको विज्ञप्तिमा उल्लेख छ।

सेनाले आफ्नो जिम्मेवारीप्रति सचेत रहँदै कुनै पनि किसिमको प्राकृतिक प्रकोपबाट नागरिकको सुरक्षा गर्न आफूहरू सदैव तयारी अवस्थामा रहेको र सोही बमोजिम पूर्वकार्यहरू सञ्चालन भइरहेको समेत प्रष्ट पारेको छ।