काठमाडौं। सुदूरपश्चिमको पहिचान र विकासको तीव्र चाहनालाई समेटेर तयार पारिएको गीत “सुदूर अब दूर नाइँ” यतिबेला डिजिटल प्लेटफर्महरूमा निकै लोकप्रिय बनेको छ। टिकटक, फेसबुक र इन्स्टाग्राम जस्ता सामाजिक सञ्जालमा यो गीतले व्यापक चर्चा र साथ पाइरहेको छ।

यस गीतको आधारशिला वर्तमान प्रधानमन्त्री तथा काठमाडौँका निवर्तमान मेयर बालेन शाहले राखेका हुन्। उनले आफ्नो चुनावी अभियानका क्रममा फेसबुकमा लेखेको ‘सुदूर अब दूर नाइँ’ भन्ने एक हरफलाई नै मुख्य ‘हुक लाइन’ बनाइएको छ। सुदूरपश्चिम अब केन्द्रबाट ओझेलमा छैन भन्ने शक्तिशाली सन्देश बोकेको उक्त वाक्यले अहिले पूर्ण साङ्गीतिक स्वरूप लिएको हो।

यो गीतको निर्माण प्रक्रिया प्रविधि र कलाको एउटा उत्कृष्ट नमुना मानिएको छ। शक्ति घिमिरेले यसलाई गीतको रूप दिएका हुन् भने हिमाल टेकसँगको सहकार्यमा आर्टिफिसियल इन्टेलिजेन्स (AI) सफ्टवेयरमार्फत धुनहरू छनोट र परीक्षण गरिएको थियो। एआईले सिर्जना गरेका धुनहरूलाई घिमिरेले व्यावसायिक अडियो इन्जिनियरिङ गरी अन्तिम रूप दिएका हुन्। यसलाई ‘मानव र एआईको संयुक्त परियोजना’ का रूपमा लिइएको छ।

सार्वजनिक भएको छोटो समयमै यो गीतले टिकटकमा मात्रै २ लाख ५० हजारभन्दा बढी भिडियोहरूमा स्थान पाइसकेको छ। सर्वसाधारणदेखि लिएर सांसद र उच्च ओहोदाका व्यक्तित्वहरूले समेत यसमा भिडियो बनाएर सुदूरपश्चिमप्रतिको ऐक्यबद्धता प्रकट गरिरहेका छन्।

गीत हिट भएपछि अन्य चर्चित कलाकारहरूले पनि यसलाई आ-आफ्नो शैलीमा गाएका छन्। तर, श्रोताहरूको प्रतिक्रिया अनुसार शक्ति घिमिरेले प्रस्तुत गरेको सुरुवाती संस्करणको प्रभाव र मौलिकता अन्यमा पाइएको छैन। यो गीत हाल १५० भन्दा बढी अन्तर्राष्ट्रिय सङ्गीत प्लेटफर्महरूमा उपलब्ध छ।