काठमाडौं। चार पटकको विश्वकप विजेता जर्मनीले फिफा विश्वकप फुटबल प्रतियोगिता, २०२६ मा विजयी सुरुआत गरेको छ। अमेरिकाको ह्युस्टन रंगशालामा आज सम्पन्न समूह ‘इ’ को खेलमा जर्मनीले क्यारेबियन राष्ट्र कुराकाओलाई ७-१ को भारी गोलअन्तरले पराजित गर्दै प्रतियोगितामा सुखद सुरुवात गरेको हो।

एकपक्षीय जस्तो देखिएको उक्त खेलमा जर्मनीले पहिलो हाफमा ३ गोल र दोस्रो हाफमा थप ४ गोल गर्दै ठूलो जित निकाल्न सफल भयो। जर्मनीका लागि काई हाभाट्र्जले दुई गोल गरे भने फेलिक्स एनमेचा, निको स्लोटरबेक, जमाल मुसिएला, नाथनियल ब्राउन र डेनिज उन्डाभले समान एक–एक गोलको योगदान दिए।

पहिलो हाफ: कुराकाओको चुनौती र जर्मनीको पुनरागमन

खेलको सुरुवाती मिनेटदेखि नै आक्रामक बनेको जर्मनीले छैटौँ मिनेटमै अग्रता लिएको थियो। टोलीका लागि फेलिक्स एनमेचाले गोल गर्दै जर्मनीलाई १–० को अग्रता दिलाए। तर, खेलको २१औँ मिनेटमा कुराकाओका लिभानो कोमेनेन्सियाले गोल फर्काएपछि खेल १–१ को रोमाञ्चक बराबरीमा पुगेको थियो।

सुरुवाती झट्कापछि सम्हालिएको जर्मनीले पुनः खेलमा पकड जमायो। ३८औँ मिनेटमा निको स्लोटरबेकले गोल गर्दै जर्मनीलाई २–१ को अग्रता दिलाए। पहिलो हाफको इन्जुरी समय (अतिरिक्त समय) मा काई हाभाट्र्जले पेनाल्टीलाई गोलमा परिणत गरेपछि जर्मनी पहिलो हाफमा ३–१ ले अघि रह्यो।

दोस्रो हाफ: जर्मनीको गोल वर्षा

दोस्रो हाफ सुरु हुनासाथ जर्मनी कुराकाओमाथि पूर्ण रूपमा हाबी भयो। खेलको ४७औँ मिनेटमा युवा स्टार जमाल मुसिएलाले गोल गर्दै खेललाई ४-१ को स्थितिमा पुर्‍याए। त्यसपछि ६८औँ मिनेटमा नाथनियल ब्राउनले गोल थपे भने ७८औँ मिनेटमा डेनिज उन्डाभले गोल गर्दै टोलीको अग्रता ६-१ बनाए।

खेल सकिन दुई मिनेट बाँकी छँदा अर्थात् ८८औँ मिनेटमा काई हाभाट्र्जले व्यक्तिगत दोस्रो गोल गर्दै जर्मनीलाई ७-१ को विशाल जित सुनिश्चित गराए।

नतिजा: यस सानदार जितसँगै समूह ‘इ’ मा रहेको जर्मनीले महत्त्वपूर्ण ३ अङ्क जोड्दै तालिकाको शीर्ष स्थानमा बलियो उपस्थिति जनाएको छ।