ढोरपाटन (बागलुङ)। धौलागिरि प्रादेशिक अस्पताल बागलुङमा मिर्गाैला रोगका बिरामी बढ्दै गएपछि डायलाइसिस सेवा विस्तार गरिएको छ। बिरामीको सङ्ख्या बढ्दै गएपछि अस्पतालमा सेवा विस्तार गरिएसँगै डायलाइसिस गर्न पालो कुर्नु नपर्ने भएको हो। अहिले मिर्गाैला रोगीका लागि अस्पतालमा छुट्टै कक्ष स्थापना गरेर सेवा दिन थालिएको हो।

नियमित डायलाइसिस गर्नुपर्ने बिरामीलाई सहज रूपमा सेवा दिने उद्देश्यले अस्पतालमा गण्डकी प्रदेश सरकारको रु २० लाख लागतमा छुट्टै कक्ष स्थापना गरिएको अस्पतालका प्रमुख डा किरण तिवारीले बताए। उनका अनुसार अस्पतालले दैनिक ६४ जनालाई डायलाइसिस सेवा दिइरहेको छ।

छुट्टै कक्ष स्थापना गरेपछि थप २० जनाको डायलाइसिस गर्नसक्ने क्षमता विस्तार भएको डा तिवारीले उल्लेख गरे। अस्पतालमा आवश्यकताअनुसार शय्या थप्ने काम भएको भन्दै उहाँले आवश्यक उपकरण प्रदेश सरकारले उपलब्ध गराउने भएपछि सेवा विस्तार गरिएको बताए।

“पछिल्लो समय मृगौला पीडित बिरामी बढ्दै गएका छन्। उहाँहरूलाई लामो समय लाइनमा बस्नुपर्दा असहज हुने देखिएपछि अस्पतालले सेवालाई थप प्रभावकारी र सहज बनाउन कक्ष स्थापना गरेको हो”, प्रमुख तिवारीले भने, “सीमित बिरामीको डायलाइसिस गर्नुपर्ने हुँदा ३० जना लाइनमा बस्नुपर्ने बाध्यता थियो। अब भने यो समस्या अन्त्य भएको छ।”

यसैबीच अस्पतालले हालै सर्पदंशको उपचार सेवा सुरु गरेको छ। योसँगै अस्पतालमा ‘सिटी स्क्यान’ उपकरण जडान भएपछि ट्रमाका बिरामीले पनि सहज रूपमा सेवा पाउन थालेका अस्पताल प्रशासनले जनाएको छ।