काठमाडौं । राष्ट्रिय स्वतन्त्र पार्टी (रास्वपा)ले पार्टीको महाधिवेशनमा सहभागी हुनका लागि लेबी अनिवार्य रूपमा चुक्ता गरेको हुनुपर्ने नियम लागू गरेको छ। पार्टीको पछिल्लो सचिवालय बैठकले लेबी नतिर्ने प्रतिनिधिहरूलाई महाधिवेशनमा प्रवेशमा रोक लगाउने निर्णय गरेको हो।

पार्टीका महामन्त्री कबिन्द्र बुर्लाकोटीका अनुसार, महाधिवेशनमा सहभागी हुने प्रत्येक प्रतिनिधिले आफ्नो जिम्मेवारीमा रहँदाको पुरानो पदअनुसारको लेबी अनिवार्य रूपमा तिरेको हुनुपर्नेछ। ‘सबै प्रतिनिधिले आफ्नो पुरानो पदअनुसारको लेबी तिरेको हुनुपर्नेछ। यदि लेबी नतिरेको खण्डमा त्यस्ता सदस्यहरूलाई महाधिवेशनमा प्रवेशका लागि रोक लगाइनेछ,’ महामन्त्री बुर्लाकोटीले स्पष्ट पारे।

यससँगै, बैठकले हालसम्म लेबी बुझाउन बाँकी रहेका सम्पूर्ण सदस्यहरूलाई यथाशीघ्र बक्यौता रकम तिर्नसमेत आग्रह गरेको छ। पार्टीको अनुशासन र निर्वाचन आचारसंहिताको पूर्ण पालना गराउने उद्देश्यले यस्तो निर्देशन जारी गरिएको पनि उनले जानकारी दिए।

रास्वपाले आन्तरिक सुशासन र सांगठनिक अनुशासनलाई जोड दिँदै महाधिवेशनलाई मर्यादित बनाउन यो निर्णय लिएको देखिन्छ।