काठमाडौं । वर्तमान समयमा दाँतको उपचार र इम्प्लान्ट (नयाँ दाँत हाल्ने) का विज्ञापनहरू जताततै देख्न सकिन्छ। तर, चीनबाट सार्वजनिक भएको एउटा घटनाले उपचारका नाममा गरिने लोभ र लापरवाहीले कसैको ज्यान नै जोखिममा पार्न सक्छ भन्ने तथ्य उजागर गरेको छ।

त्यहाँ एक ६३ वर्षीय वृद्धको एउटा दाँत मात्र दुखिरहेको थियो, तर क्लिनिकले उनलाई यस्तो भ्रममा पार्यो कि उनको मुखमा बाँकी रहेका अन्य १२ वटा दाँत पनि निकालिदियो। यति मात्र होइन, उपचारको बहानामा उनको बैंक खाता र डिजिटल वालेटबाट लगभग सबै रकम समेत निकालिएको छ।

साउथ चाइना मर्निङ पोस्टको रिपोर्ट अनुसार, चीनको सान्सी प्रान्तको बाओजी सहरका बासिन्दा ६३ वर्षीय ली (परिवर्तित नाम) गत वर्ष सेप्टेम्बरमा एउटा दाँत दुखेको गुनासो लिएर ‘दातुआनयुआन डेन्टल क्लिनिक’ पुगेका थिए।

लीका अनुसार उनी क्लिनिकको ठुल्ठुला दाबी गरिएका विज्ञापनहरूबाट प्रभावित भएका थिए। विज्ञापनमा लेखिएको थियो— “बिहान डेन्टल इम्प्लान्ट गराउनुहोस्, दिउँसो मासु खानुहोस् र सबै दाँत हालेर १०० वर्षसम्म बाँच्नुहोस्।”

लीका अनुसार क्लिनिकका कर्मचारीहरूले उनलाई घरबाट ल्याउनका लागि गाडी पठाएका थिए र निःशुल्क परीक्षणको अफर दिएका थिए। तर, परीक्षणपछि जे भयो त्यसले पूरा परिवारलाई स्तब्ध बनायो। एउटा दाँतको दुखाइको उपचार गराउन पुगेका लीको मुखबाट डाक्टरहरूले बाँकी रहेका सबै १२ वटा दाँत निकालिदिए। त्यसपछि एउटै प्रक्रियामा १० वटा डेन्टल इम्प्लान्ट पनि हालिदिए।

मामिला यत्तिमै सकिएन। क्लिनिकले उपचारको नाममा लीको बैंक खाता र डिजिटल वालेटबाट १८,८०० युआन (करिब ४ लाख २० हजार रुपैयाँ) निकाल्यो। यसका बावजुद उनीमाथि ६,२०० युआन (करिब १ लाख ४० हजार रुपैयाँ) को अतिरिक्त बिल बाँकी रहेको देखाइयो।

लीले चिनियाँ सञ्चारमाध्यमलाई बताए अनुसार, जब उनका छोरा उनलाई लिन आइपुगे, तब उनको पूरा मुख रगतले भरिएको थियो। उनीसँग बसको भाडा तिर्नका लागि मात्र ३० युआन बाँकी बचेको थियो।

सबैभन्दा आश्चर्यजनक कुरा त के थियो भने, ली पहिलेदेखि नै कैयौँ गम्भीर रोगहरूबाट पीडित थिए। उनलाई कोरोनरी हार्ट डिजिज (मुटुको रोग), हृदयघात, मधुमेह (डायबिटिज) र उच्च रक्तचाप जस्ता समस्याहरू थिए। उनको मुटुमा चारवटा स्टन्ट समेत हालिएको छ।

चिकित्सा विशेषज्ञहरूका अनुसार यस्तो अवस्थामा कुनै बिरामीको दाँत निकाल्न वा तुरुन्तै डेन्टल इम्प्लान्ट गर्न अगाडि निकै सावधानी अपनाउनुपर्छ। कैयौँ मामिलामा यसो गर्नु घातक सिद्ध हुन सक्छ। वुहान विश्वविद्यालयको रेनमिन अस्पतालका दन्त रोग विशेषज्ञ फु दोङ्जीका अनुसार, मधुमेहका बिरामीहरूको सुगरको स्तर नियन्त्रणमा नआई डेन्टल इम्प्लान्ट गरिनु हुँदैन।

चीनमा यसअघि पनि यस्तै एउटा घटना सार्वजनिक भएको थियो, जसमा एक व्यक्तिको एकै दिनमा २३ वटा दाँत निकालेर १२ वटा इम्प्लान्ट हालिएको थियो। उक्त उपचारको १३ दिनपछि ती व्यक्तिको मृत्यु भएको थियो।

लीको परिवारले स्थानीय स्वास्थ्य विभागमा तीन पटक उजुरी दर्ता गराएका थिए। परिवारको आरोप अनुसार क्लिनिकले अपुरो मेडिकल रेकर्ड उपलब्ध गराएको थियो र पछि थुप्रै कागजातहरू थप्दै गयो।

यति मात्र होइन, मेडिकल रेकर्डमा लीको लिंग समेत ‘महिला’ लेखिएको थियो। परिवारका अनुसार शल्यक्रिया गर्नुअघि मुटुरोग विशेषज्ञ (कार्डियोलोजिस्ट) को सल्लाह लिएको रेकर्ड पनि ६ महिनापछि मात्र उपलब्ध गराइएको थियो, जसका कारण उनीहरूलाई कागजातमा हेरफेर गरिएको आशंका भयो।

स्थानीय स्वास्थ्य विभागको अनुसन्धानमा क्लिनिक कैयौँ मामिलामा दोषी पाइएको छ। अनुसन्धानबाट बिरामीलाई उपचारका अन्य विकल्पहरू नबताइएको, शल्यक्रियाअघि आवश्यक पर्ने स्वास्थ्य परीक्षणहरू नगरिएको र मेडिकल रेकर्डहरू पनि तोकिएको मापदण्ड अनुसार नराखिएको खुलासा भएको छ।

यसपछि अधिकारीहरूले क्लिनिकलाई लीबाट असुल गरिएको सबै शुल्क फिर्ता गर्न आदेश दिएका छन् भने क्लिनिकलाई सुधारात्मक कारबाहीका लागि हाल बन्द गरिएको छ।