काठमाडौं । अमेरिकाले सिरियालाई आतङ्कवाद प्रायोजन गर्ने राष्ट्रहरूको सूचीबाट औपचारिक रूपमा हटाएको छ। ट्रम्प प्रशासनको यो निर्णयलाई सिरियाका लागि ठूलो परिवर्तनका रूपमा हेरिएको छ। यस कदमबाट देशमाथि लगाइएका कैयौँ आर्थिक तथा व्यापारिक प्रतिबन्धहरूमा छुट पाउने बाटो खुल्न सक्नेछ भने अमेरिकाका तर्फबाट सैन्य सहायता प्राप्त हुने सम्भावनासमेत बढेको छ।

अमेरिकी विदेशमन्त्री मार्को रुबियोले यो निर्णय सिरियाली जनतालाई उज्ज्वल भविष्य र आर्थिक प्रगतिको दिशामा अघि बढाउने एक ऐतिहासिक कदम भएको बताएका छन्। अमेरिकाले यसका साथै अहमद अल-शराको हयात तहरीर अल-शाम (एचटीएस) लाई पनि विशेष रूपमा मनोनीत विश्वव्यापी आतङ्ककारीको सूचीबाट हटाएको छ।

यस निर्णयको प्रत्यक्ष फाइदा सिरियाका राष्ट्रपति अहमद अल-शरालाई पुग्ने देखिन्छ। शरा पहिले एचटीएसका नेता थिए र हाल सिरियाका राष्ट्रपति छन्। उनको पुरानो नाम अबु मोहम्मद अल-जोलानी थियो। अमेरिकी राष्ट्रपति डोनाल्ड ट्रम्प पछिल्लो केही समयदेखि शराप्रति निकै सकारात्मक देखिँदै आएका छन्। ट्रम्पले उनलाई ‘शानदार’, ‘अत्यन्तै सम्मानित’ र ‘कडा’ नेताका रूपमा वर्णन गरेका छन्। यी दुई नेताहरूबीच भेटवार्तासमेत भइसकेको छ।

अमेरिकाले सन् १९७९ मा सिरियालाई आतङ्कवाद प्रायोजित गर्ने राष्ट्रको सूचीमा राखेको थियो। त्यसपछि दशकौँसम्म सिरियामाथि विभिन्न किसिमका आर्थिक तथा व्यापारिक प्रतिबन्धहरू कायम रहेका थिए। अब भने शरा सरकारले आतङ्कवादी सङ्गठनहरूविरुद्ध प्रभावकारी कारबाही गरेको अमेरिकाको भनाइ छ। रुबियोका अनुसार सिरियाले आईएसआईएस र अल-कायदा लगायतका कैयौँ आतङ्कवादी सञ्जालहरूविरुद्ध अभियान चलाएको छ भने ‘ग्लोबल कोअलिसन टु डिफिट आईएसआईएस’ मा समेत सहभागी भएको छ।

अमेरिकाको यस निर्णयले सिरियामा विदेशी लगानी र निजी कम्पनीहरूका लागि ढोका खोल्न सक्नेछ। आतङ्कवाद प्रायोजक राष्ट्रको ट्याग हटेसँगै सिरियाको आर्थिक पुनरुत्थान र विश्व अर्थतन्त्रमा उसको पुनरागमन सहज हुने अमेरिकी प्रशासनको दाबी छ।

यो निर्णय यस्तो समयमा आएको छ, जब इजरायल र सिरियाबीच तनाव चरम बिन्दुमा पुगेको छ। हालै इजरायलले सिरियाको अबु अल-दुहुर एयरबेसमा आक्रमण गरेको थियो, जसका कारण क्षेत्रीय तनाव थप बढेको थियो। यस्तो संवेदनशील वातावरणमा अमेरिकाले सिरियालाई दिएको यो ठूलो आर्थिक तथा राजनीतिक राहतलाई ट्रम्प प्रशासनको पश्चिम एसिया नीतिको एक महत्त्वपूर्ण फेरबदलका रूपमा हेरिएको छ।