काठमाडौं। नेपाल स्टक एक्सचेन्ज (नेप्से) मा आजदेखि नियमित सेयर कारोबार सञ्चालन हुने भएको छ।

नेप्सेका ७२ वटा कारोबार सदस्य कम्पनीका सर्भर राखिएको डेटा सेन्टर ‘डेटा हब प्रालि’मा देखिएको प्राविधिक समस्या समाधान भएपछि कारोबार नियमित रूपमा सञ्चालन गर्न लागिएको नेप्सेले जनाएको छ।

डेटा हबमा असोज ४ गते बिहानदेखि प्राविधिक समस्या देखिएपछि नेप्सेले असोज ५ गते सोमबारका लागि तय भएको नियमित सेयर कारोबार स्थगित गरेको थियो। डेटा सेन्टरको समस्या यथावत् रहेको अवस्थामा कारोबार सञ्चालन गर्दा नेप्सेको कारोबार प्रणालीमा समेत असर पर्न सक्ने जोखिम देखिएपछि कारोबार रोक्ने निर्णय गरिएको थियो।

यसअघि स्टक ब्रोकर एसोसिएसन अफ नेपालले डेटा सेन्टरमा देखिएको समस्या समाधान नभएसम्म नियमित कारोबार सञ्चालन नगर्न नेप्सेसमक्ष आग्रह गरेको थियो। उक्त निवेदनपछि नेप्सेले धितोपत्र सूचीकरण तथा कारोबार नियमावली, २०७५ को नियम २१ (१) बमोजिम असोज ५ गतेको नियमित कारोबार स्थगित गरेको थियो।

नेप्सेका अनुसार डेटा हबमा देखिएको प्राविधिक समस्या समाधान भइसकेको जानकारी प्राप्त भएपछि आजदेखि नियमित सेयर कारोबार सञ्चालन गर्न लागिएको हो।

एक दिन कारोबार स्थगित भएपछि समस्या समाधान भएकाले अब नेप्सेको कारोबार प्रणाली नियमित रूपमा सञ्चालन हुने भएको छ।