काठमाडौं। नेपाली कांग्रेसका पूर्वसभापति शेरबहादुर देउवा पार्टीको १५औँ महाधिवेशनअन्तर्गत क्षेत्रीय प्रतिनिधिमा निर्वाचित भएका छन्।

पार्टीको आफू नेतृत्वको समूह (इतर समूह) ले बिहीबार सञ्चालन गरेको वडा अधिवेशनबाट देउवा गृहजिल्ला डडेलधुराको गन्यापधुरा गाउँपालिका वडा नं. १ बाट क्षेत्रीय प्रतिनिधिमा सर्वसम्मत वा बहुमतका साथ निर्वाचित भएका हुन्। उनले वारेसनामामार्फत क्षेत्रीय प्रतिनिधिका लागि मनोनयन दर्ता गराएका थिए।

क्षेत्रीय प्रतिनिधिमा निर्वाचित भएसँगै देउवालाई महाधिवेशन प्रतिनिधिको उम्मेदवार बन्ने बाटो खुलेको छ। प्रतिनिधिसभा क्षेत्रको क्षेत्रीय अधिवेशनबाट महाधिवेशन प्रतिनिधि चयन भएपछि मात्र केन्द्रीय महाधिवेशनमा सहभागी हुन पाइने वैधानिक व्यवस्था छ। कांग्रेसको इतर समूहले असोज २४ गते क्षेत्रीय अधिवेशन आयोजना गर्ने कार्यतालिका बनाएको छ।

नेपाली कांग्रेस डडेलधुराका उपसभापति दिल्लीराज जोशीका अनुसार जिल्लाका कुल ५२ वडामध्ये ३० वटा वडामा अधिवेशन सम्पन्न भइसकेको छ। बाँकी रहेका वडाहरूमा नयाँ वडा कार्यसमिति गठनको प्रक्रिया अघि बढाइएको उनले जानकारी दिए।