काठमाडौं। राष्ट्रिय प्रजातन्त्र पार्टी (राप्रपा) का सांसद ज्ञानबहादुर (ज्ञानेन्द्र) शाहीले ‘जेनजी’ आन्दोलनको छानबिन गर्न गठित आयोगको प्रतिवेदनले दोषी ठहर गरेका व्यक्तिहरू र भ्रष्टाचारमा संलग्न सबैलाई तत्काल कारबाही गर्न माग गरेका छन्।

प्रतिनिधिसभाको आजको बैठकमा विशेष समय लिएर बोल्दै सांसद शाहीले अपराधजन्य कुनै पनि घटनामा दोषी प्रमाणित भएका व्यक्तिहरूलाई कारबाही गरिए त्यसमा आफ्नो पार्टीको तर्फबाट पूर्ण समर्थन रहने स्पष्ट पारे।

नेता शाहीले रोजगारीका लागि युवाहरू विदेश जान बाध्य भइरहेको वर्तमान अवस्थाको अझै अन्त्य हुन नसकेको टिप्पणी गर्दै स्वदेशमै उद्योग, कलकारखाना र स्वास्थ्य संस्थाहरूको थप विकास गर्न सरकारसँग जोडदार आग्रह गरे।

यस्तै, उनले हालैको प्राकृतिक विपद्बाट प्रभावित बाढीपीडितहरूका लागि उचित राहत र क्षतिपूर्तिको व्यवस्था गर्दै उनीहरूलाई चाँडो पुनर्स्थापना गर्न ठोस र प्रभावकारी कार्यक्रम ल्याउनेतर्फ सरकारको ध्यानाकर्षण गराएका छन्।