लमजुङ। दशैंको लामो बिदा परिवार तथा साथीभाइसँगै घुमफिर गर्न, धार्मिक दर्शन गर्न र नयाँ ठाउँको अनुभव साट्नका लागि उत्कृष्ट अवसर हो।

हिमाल, पहाड, प्राकृतिक सौन्दर्य, मौलिक संस्कृति, ऐतिहासिक धरोहर र धार्मिक आस्थाको बेजोड संगम बोकेको लमजुङ जिल्लामा छोटो तथा लामो दूरीका यात्राका लागि थुप्रै आकर्षक गन्तव्यहरू रहेका छन्। जिल्लाका प्रमुख पर्यटकीय तथा धार्मिक स्थलहरूमध्ये २०८३ सालको दसैँ बिदामा भ्रमण गर्न सकिने १० प्रमुख गन्तव्यहरू निम्नअनुसार रहेका छन्:

१. गाउँसहर–लमजुङ दरबार (बेँसीसहर नगरपालिका-३)

लमजुङको प्राचीन इतिहास र शाहवंशीय राज्यको उद्गमस्थलका रूपमा चिनिने गाउँसहर जिल्लाकै महत्त्वपूर्ण ऐतिहासिक एवं पुरातात्विक गन्तव्य हो। यहाँ प्रसिद्ध गाउँसहर दरबार, लमजुङ कालिका मन्दिरका साथै राजा यशोब्रह्म शाहसँग सम्बन्धित ऐतिहासिक संरचनाहरू रहेका छन्। इतिहास, धर्म र संस्कृतिको सङ्गम भएकाले दसैँको समयमा यस क्षेत्रको भ्रमण गर्नुको विशेष धार्मिक तथा सांस्कृतिक महत्त्व रहन्छ।

२. तुर्लुङकोट कालिका (सुन्दरबजार नगरपालिका-११)

प्राचीन इतिहास र गहिरो धार्मिक आस्थासँग जोडिएको तुर्लुङकोटमा ऐतिहासिक कालिका मन्दिर तथा अन्य पुरातात्विक अवशेषहरू रहेका छन्। एकातिर शान्त धार्मिक वातावरण र अर्कोतिर मनोरम पहाडी भूभागको दृश्यावलोकन गर्न सकिने भएकाले दसैँ बिदामा घुमफिरका लागि यो एक उपयुक्त गन्तव्य हो।

३. पुरानकोट गढी (बेँसीसहर नगरपालिका-४)

ऐतिहासिक तथा सामरिक महत्त्व बोकेको पुरानकोट गढी लमजुङको पुरानो राज्य इतिहाससँग प्रत्यक्ष जोडिएको स्थल हो। अग्लो स्थानमा अवस्थित यस गढी क्षेत्रबाट आसपासका सुन्दर पहाडी भूभाग, डाँडाकाँडा र ग्रामीण बस्तीहरूको आकर्षक दृश्य सहजै अवलोकन गर्न सकिन्छ।

४. काउलेपानी (बेँसीसहर नगरपालिका-३)

मौलिक गाउँबस्ती, न्यानो आतिथ्यतासहितको होमस्टे, धार्मिक स्थल र प्राकृतिक सौन्दर्य काउलेपानीका मुख्य आकर्षण हुन्। गाउँसहर दरबारको नजिकै रहेकाले गाउँसहर र काउलेपानीको यात्रालाई एकैसाथ जोडेर इतिहास र ग्रामीण पर्यटनको अनुभव लिन सकिन्छ।

५. राइनासकोट (राइनास नगरपालिका-९)

ऐतिहासिक, धार्मिक तथा प्राकृतिक दृष्टिकोणले अत्यन्तै महत्त्वपूर्ण मानिने राइनासकोट लमजुङको एक आकर्षक पहाडी गन्तव्य हो। यहाँबाट मनमोहक सूर्योदय, सूर्यास्तका साथै आसपासका हिमश्रृङ्खला र पहाडी भूभागको मनोरम दृश्य देखिन्छ। राइनास नगरपालिकाले यस क्षेत्रलाई नगरको प्रमुख पर्यटकीय पहिचानका रूपमा विकास गर्दै लगेको छ।

६. घलेगाउँ (क्व्होलासोथार गाउँपालिका-३)

सार्क मोडेल भिलेजका रूपमा चर्चित घलेगाउँ गुरुङ संस्कृति, परम्परागत घनावस्ती, स्तरीय होमस्टे, स्थानीय परिकार र दक्षिण एसियामै प्रसिद्ध हिमाली दृश्यका लागि चिनिन्छ। घले राजाको इतिहास, गुरुङ सङ्ग्रहालय, स्थानीय मन्दिर तथा सांस्कृतिक सम्पदाहरूले यसलाई ग्रामीण र सांस्कृतिक पर्यटनको उत्कृष्ट केन्द्र बनाएका छन्।

७. भुजुङ (क्व्होलासोथार गाउँपालिका-४)

अखण्ड र मौलिक गुरुङ बस्ती, परम्परागत जीवनशैली, जीवन्त संस्कृति र रमणीय प्राकृतिक वातावरण भुजुङका मुख्य विशेषता हुन्। यहाँका स्थानीय होमस्टेमा बसेर ग्रामीण जीवनशैली तथा गुरुङ समुदायको मौलिक संस्कृतिलाई नजिकबाट नियाल्न र अनुभव गर्न सकिन्छ।

८. घनपोखरा (मर्स्याङ्दी गाउँपालिका-१ र २)

मनमोहक हिमाली दृश्य, धनी गुरुङ संस्कृति, सरल ग्रामीण जीवनशैली र प्राकृतिक सौन्दर्यले घनपोखरालाई पर्यटकीय दृष्टिकोणले निकै आकर्षक बनाएको छ। प्रसिद्ध घलेगाउँसँगै जोडेर यात्रा गर्न सकिने भएकाले प्रकृति र संस्कृतिको दोहोरो अनुभवका लागि यो ठाउँ अत्यन्त उपयोगी मानिन्छ।

९. करापुटार–इशानेश्वर महादेव (मध्यनेपाल नगरपालिका-७)

लमजुङको प्रसिद्ध र महत्त्वपूर्ण धार्मिक गन्तव्यका रूपमा परिचित करापुटारमा ऐतिहासिक इशानेश्वर महादेवको मन्दिर रहेको छ। धार्मिक आस्था, शिवरात्रि तथा दसैँको विशेष सांस्कृतिक महत्त्व बोकेको यस क्षेत्रमा बिदाको समयमा दर्शनार्थी तथा पर्यटकहरूको उल्लेख्य उपस्थिति रहने गर्छ।

१०. इलमपोखरी (दूधपोखरी गाउँपालिका)

प्राकृतिक सौन्दर्य र धार्मिक महत्त्व बोकेको इलमपोखरी ग्रामीण पर्यटनको अर्को आकर्षक गन्तव्य हो। पोखरी परिसर र आसपासको शान्त एवं मौलिक प्राकृतिक वातावरणले कोलाहलबाट मुक्त भई रमणीय स्थल खोज्ने पर्यटकहरूलाई सहजै आकर्षित गर्छ। इलमपोखरी लमजुङका प्रमुख सूचीकृत पर्यटकीय स्थलहरूमध्ये एक हो।

लमजुङका यी १० गन्तव्यहरूले एउटै जिल्लभित्र इतिहास, धर्म, संस्कृति, प्रकृति र ग्रामीण जीवनशैलीको बहुआयामिक अनुभव प्रदान गर्ने भएकाले दसैँको बिदामा पारिवारिक तथा व्यक्तिगत घुमफिरका लागि उत्कृष्ट विकल्प बन्न सक्छन्।