काठमाडौं। चीनले आफ्नो देशमा भन्दा पहिले अमेरिकामा कोरोनाभाइरस देखिएको आशंका गर्दै आफ्नो देशमा अमेरिकी सेनाले भाइरस फैलाइदिएको आरोप लगाएको छ । चीनको विदेश मन्त्रालयका प्रवक्ता झाओ लिजियानले ट्वीट गर्दै यस्तो आरोप लगाएका हुन् । यसअघि अमेरिकी सुरक्षा सल्लाहकारले समेत चीनमाथि भाइरस पत्ता लागेपछि पनि यो जानकारी विश्वसँग लुकाएको र यही जानकारी लुकाउँदा भाइरस फैलिन सघाउ पुगेको आरोप लगाएका थिए । यससँगै बेइजिङ र वाशिङटनबीच वाकयुद्ध चर्किएको छ ।

1/2 CDC Director Robert Redfield admitted some Americans who seemingly died from influenza were tested positive for novel #coronavirus in the posthumous diagnosis, during the House Oversight Committee Wednesday. #COVID19 pic.twitter.com/vYNZRFPWo3

— Lijian Zhao 赵立坚 (@zlj517) March 12, 2020

केही दिनअघि वुहानकी एक डाक्टरले आफूहरुले भाइरस पत्ता लगाएपछि सरकारी अधिकारीहरुलाई यसको जानकारी दिएको तर अधिकारीहरुले आफूहरुलाई सूचना लुकाउन दबाब दिएको भन्दै एक चिनियाँ म्यागजिनलाई अन्तरवार्ता दिएकी थिइन् । ती डाक्टरको खुलासासँगै अमेरिकाले चीनमाथि पारदर्शी नभएको र जानकारी लुकाएको आरोप लगाएको थियो । यसैको जवाफमा चिनियाँ विदेशमन्त्रालयमा प्रवक्ता झाओले अमेरिकामाथि नै गम्भीर आरोप लगाएका हुन् ।

झाओले ट्वीटरमा लेखेका छन् ‘अमेरिकामा प्यासेन्ट जीरो (पहिलो संक्रमित) कहिले सुरु भयो ? कति मानिसहरु संक्रमित छन् ? अस्पतालहरुका नामहरु के–के हो ? सम्भवतः त्यो अमेरिकी सेना हुनुपर्छ जले महामारी वुहानमा ल्यायो । पारदर्शी बन । तिम्रो तथ्यांक सार्वजनिक गर । अमेरिका हामीबाट स्पष्टीकरण चाहन्छ ।’ यसअघि चिनियाँ विदेश मन्त्रालयका अर्का प्रवक्ता गेंग सुआंगले पनि अमेरिकी अधिकारीको प्रतिक्रियालाई ‘विवेकहीन र गैरजिम्मेवार’ भन्दै आलोचना गरेका थिए ।