काठमाडौं। नेपाल–भारत सीमा क्षेत्रमा भारततर्फको लखीमपुर खिरी जिल्लामा भएको घटनाका विषयमा तनाव बढ्दै जाँदा उत्तर प्रदेश पुलिसले प्रदेशका पूर्व मुख्यमन्त्री अखिलेश यादवलाई हिरासतमा लिएको छ । आफूलाई पुलिसले लखीमपुर खिरी आउनबाट रोकेर घरमै नजरबन्दमा राख्न खोजेपछि यादव आफ्नै घरअगाडि धर्नामा बसेका थिए ।

समाजवादी पार्टीका अध्यक्षसमेत रहेका यादवलाई पक्राउ गरिएपछि समाजवादी पार्टीका कार्यकर्ताहरुले हंगामा गरेका छन् । यादवले कार्यकर्ताहरुलाई पुलिसको काममा अवरोध नगर्न आग्ह गरेका छन् । यादवसहित समाजवादी नेता प्रोफेसर रामगोपाल यादव र १५० देखि २ सय पार्टी कार्यकर्तालाई पनि हिरासतमा लिइएको छ ।

सोमबार बिहान करिब ९ बजे अखिलेर लखीमपुर खिरी जानको लागि घरबाट निस्किएका थिए तर पुलिसले उनलाई रोकेको थियो । त्यसपछि उनी आफ्नो घरअगाडि नै धर्नामा बसेका थिए । अखिलेश यादवले घटनापछि भारतका भाजपा सरकारमा जति अन्याय र अत्याचार भएको छ त्यस्तो अंग्रेजको शासनकालमा पनि नभएको बताएका छन् ।

अखिलेश यादवले भने ‘किसानहरुमाथि अंग्रेजहरुले भन्दा पनि धेरै अत्याचार गरिएको छ । भारतीय जनता पार्टी किसानहरुमाथि अंग्रेजहरुभन्दा पनि क्रुर भएको छ । अंग्रेजको जमानामा पनि यति अत्याचार भएको थिएन होला । जो कोहीले भनिरहेका छन् कि यो सरकारले जसको पनि ज्यान लिन सक्छ ।’