काठमाडौं। नेपाल भारत सीमा क्षेत्रमा कैलालीको टिकापुरको पारिपट्टि लखीमपुर खिरी जिल्लामा भएको हिंस्रक झडपमा ४ किसान, ३ जना भाजपाका कार्यकर्ता र एक पत्रकारको मृत्यु हुने गरी भएको हिंस्रक झडप रोक्न सहमति भएको छ । हिंसापछि मृतक किसानको शव सडकमा राखेर लगातार विरोध प्रदर्शन गरिरहेका किसान र लखीमपुर खिरी प्रशासनबीच सहमति भएको भारतीय मिडियाले जनाएका छन् ।

प्रशासन र किसानहरुबीच भएको वार्तामा हिंसामा मारिएका सबै मृतकका परिवारलाई ४५–४५ लाख रुपैयाँ आर्थिक सहयोग दिइनेछ । यसका साथै मृतकका परिवारका एक सदस्यलाई सरकारी जागिर दिइनेछ । घाइतेहरुलाई १०–१० लाख रुपैयाँ क्षतिपूर्ति दिइनेछ । यो घटनाको अनुसन्धान उच्च अदालतका अवकाशप्राप्त न्यायाधीशको निगरानीमा गरिनेछ । किसान नेता राकेश टिकैत र एडिजी ल एण्ड अर्डर प्रशान्त कुमारले साझा पत्रकार सम्मेलन गरेर यसको जानकारी दिएका हुन् ।

राकेश टिकैतले भने ‘पहिलो कुरा केन्द्रीय गृह राज्यमन्त्रीको नाममा एफआइआर दर्ता भएको छ । प्रशासनले १०–११ दिनको समय मागेको छ यदि त्यो समयमा कारवाही भएन भने हामी पञ्चायत गर्नेछौं । हामी किसानहरुको दाह संस्कारसम्म यहीँ रहनेछौं र ५ डाक्टरको निगरानीमा पोस्टमार्टम हुनेछ । यसको भिडियो रेकर्डिङ गरिनेछ । अहिले इन्टरनेट चलिरहेको छैन त्यसैले हामीले सबै भिडियो प्रमाण नपाएको हुन सक्छ तर जब इन्टरनेट चल्नेछ तपाइँहरुसँग कुनै भिडियो भए हामीलाई पठाउनुस् ।’