पाकिस्तानको ऐतिहासिक जितपछि ‘मारो मुझे मारो’ वाला भाइरल पाकिस्तानी फ्यानले के भने ?

डिसी नेपाल

८ कार्तिक २०७८ १०:४८

20.3k

काठमाडौं। २०१९ को एकदिवसीय विश्वकप क्रिकेटको खेलमा पाकिस्तानले भारतसँग हारेपछि ‘ओ भाइ, मारो मुझे मारो’ भनेर भाइरल भएका पाकिस्तानी फ्यान गएराती पाकिस्तानले भारतमाथि ऐतिहासिक जित हात पारेपछि फेरि चर्चामा आएका छन् । पाकिस्तानी फ्यान मोमिन शाकिबले हिजोको जितपछि ‘जज्बात बदलिएको’ टिप्पणी गरेका छन् ।

गएराती दुबइमा भएको सुपर १२ अन्तर्गत समूह २ को खेलमा पाकिस्तानले भारतलाई १० विकेटले पराजित गरेको थियो । यो टि–२० क्रिकेट इतिहासमै भारतको सबैभन्दा ठूलो हार हो र पाकिस्तानको सबैभन्दा ठूलो जित हो । टि–२० क्रिकेटमा यसअघि भारतले कहिल्यै पनि १० विकेटले हारेको थिएन र पाकिस्तानले पनि कहिल्यै १० विकेटले जितेको थिएन ।

आइतबार दुबइमा पाकिस्तानको ऐतिहासिक जीत प्रत्यक्ष हेर्नको लागि मोमिन शाकिब दुबइ अन्तर्राष्ट्रिय क्रिकेट स्टेडियममै थिए । पाकिस्तानको ऐतिहासिक जितसँगै उनले कैयौं भिडियोहरु इन्स्टाग्राममा शेयर गरेका छन् । भिडियोमा उनी उत्सव मनाउने मुडमा देखिन्छन् र उनले आजको रात नसुत्ने बताएका छन् । एक भिडियोमा उनले बलिउड अभिनेता अक्षय कुमारसँग कुरा गरिरहेको पनि देख्न सकिन्छ । ‘मैले केही बुझ्न सकिरहेको छैन । म खुसीले पागल हुनेछु’ उनले आफ्नो एउटा भिडियोमा क्याप्सन लेखेका छन् ।