काठमाडौं। बेलायतकी सुन्दरी लीन क्लाइभलाई ग्लोबल ब्युटी कन्टेस्ट मिसेज वर्ल्डमा सहभागी हुनको लागि अमेरिकाले आफ्नो देशमा प्रवेश गर्न अनुमति दिएन । यस विषयमा जानकारी दिँदै क्लाइभले आफू सिरियामा जन्मिएकै कारण अमेरिकाले भिसा दिन अस्वीकार गरेको बताएकी छिन् ।

२९ वर्षीय मोडल क्लाइभले १५ जनवरीमा अमेरिकाको लस भेगासमा हुने मिसेज वर्ल्ड प्रतियोगिताको लागि बेलायतको प्रतिनिधित्व गर्दै जानुपर्ने छ तर उनलाई भिसा दिन अस्वीकार गरिएको छ । क्लाइभले बीबीसीसँग कुरा गर्दै लस भेगास जानको लागि उनका पति र छोरीलाई भने भिसा दिइएको तर आफूलाई नदिइएको बताइन् । उनले आफू सिरियाको राजधानी दमास्कसमा जन्मिएकै कारण यस्तो गरिएको उनको आरोप छ । अमेरिकी अधिकारीहरुले भने यस विषयमा कुनै प्रतिक्रिया दिन अस्वीकार गरेका छन् ।

लीन क्लाइभ २०१३ देखि बेलायतमा बस्दै आएकी छिन् । उनी पेसाले डाक्टर हुन् र अहिले उनको ट्रेनिङ चलिरहेको छ । यसका साथै उनी एक मोडल पनि हुन् । क्लाइभले महिला समानता र शरणार्थीको अधिकारको लागि एक कार्यक्रम पनि गरेकी थिइन् । १५ जनवरीमा हुने मिसेज वर्ल्डमा भाग लिनुपर्ने भए पनि उनले भिसा नपाएका कारण कार्यक्रममा सहभागी हुन पाउने छैनन् । यो प्रतियोगितामा ५७ देशका सुन्दरीले भाग लिने तालिका छ ।

यस विषयमा क्लाइभले भनेकी छिन् ‘मैले ब्रिटिश पासपोर्टको साथमा आवेदन दिएकी थिएँ । म बेलायतको प्रतिनिधित्व गर्दैछु र म एक ब्रिटिश नागरिक हुँ । मलाई थाहा थिएन कि अमेरिकामा प्रवेश गर्न रोक लगाइनेछ ।’ क्लाइभले अमेरिकी दुतावाससँग प्रतियोगितामा भाग लिनका लागि समयमै भिसा दिन आग्रह गरेकी छिन् । अमेरिकी सरकारको नियम अनुसार जुन देशमा राज्य प्रायोजित आतंकवाद भइरहेको छ त्यहाँ जन्मिएका भिसा आवेदकले छुट्टै अधिकारीलाई अन्तरवार्ता दिनुपर्छ । सिरियालाई राज्य प्रायोजित आतंकवाद भएको देशको रुपमा गणना गरिन्छ ।