काठमाडौं। एक जना वीर्यदातासँग १० पटकसम्म सुतेर गर्भधारण गरेकी एक महिलाले तीस् वीर्यदाताले झुटो बोलेको आरोप लगाउँदै त्यो गर्भबाट जन्मिएको बच्चा त्यागेकी छिन् । उनले ती वीर्यदातासँग ३३० मिलियन जापानी येन (करिब ३५ करोड रुपैयाँ) क्षतिपूर्ति माग गर्दै अदालतमा मुद्दा हालिदिएकी छिन् । महिलाको उमेर ३० वर्ष भएको बताइएको छ ।

जापानमा आइभीएफ क्लिनिकको कमी छ त्यसैले महिलाहरु आफैंले वीर्यदाता खोज्छन् । यी महिलाले पनि त्यसै गरेकी थिइन् । तर, अब बच्चा जन्मिइसकेपछि यी महिलाले आफूसँग धोका भएको र आफूलाई भावनात्मक रुपमा पनि नोक्सानी भएको दावी गरेकी छिन् । यसरी बच्चा जन्माएर छोडेका कारण महिलाको आलोचना भइरहेको छ ।

भाइसका अनुसार वीर्यदाताको कथित झुटको खुलासापछि महिलाले बच्चा एक सरकारी केन्द्रमा दिएकी छिन् । त्यहाँबाट त्यो बच्चा अरु कुनै अभिभावकत्व लिन चाहने दम्पतीलाई दिने प्रक्रिया सुरु गरिएको छ । महिलाले आफ्ना वीर्यदाताले आफ्नो राष्ट्रियता र शिक्षाको बारेमा झुट बोलेको आरोप लगाएकी छिन् । महिलाले ती वीर्यदाताले आफूसँग शारीरिक सम्बनध राख्नका लागि यसरी झुट बोलेको आरोप लगाएकी छिन् ।

रिपोर्टका अनुसार महिला विवाहित हुन् र जापानको टोक्योमा बस्छिन् । उनका अनुसार वीर्य दाताले आफू जापानी नागरिक भएको र क्योटो युनिभर्सिटीबाट ग्रयाजुएसन गरेको भनेका थिए । तर, पछि ती व्यक्ति जापानी नभइ चिनियाँ भएको र क्योटो नभइ अर्कै विश्वविद्यालयमा पढेको र सिंगलको सट्टा विवाहित भएको थाहा पाएपछि आफूले धोका पाएको थाहा भएको महिलाले बताएकी छिन् । यो खुलासापछि उनले क्षतिपूर्ति माग गर्दै अदालत गएकी हुन् ।

महिला पहिल्यै एक बच्चाकी आमा हुन् । २०१९ मा सामाजिक संजालमार्फत उनी यी वीर्यदाताको सम्पर्कमा आएकी थिइन् । महिलाका पति खास किसिमको स्वास्थ्य समस्याले ग्रसित भएका कारण उनले वीर्यदाताबाट बच्चा जन्माउने फैसला गरेकी थिइन् । गर्भवती भएपछि बच्चा जन्मिनु भन्दा पहिल्यै महिलाले वीर्यदाताको झुट थाहा पाएकी थिइन् तर त्यतिबेलासम्म गर्भपतन गर्न ढिलो भइसकेको थियो । जापानकी बाल कल्याण कार्यकर्ताले महिलाको यो हर्कतलाई ‘गम्भीरता नभएको’ भन्दै उनले बच्चालाई वस्तुजस्तो व्यवहार गरेको आरोप लगाएकी छिन् ।