काठमाडौं । सुडानको रेड सी बन्दरगाह सुआकिनमा आइतबार एउटा जहाज डुबेको छ । यो जहाजमा हजारौं भेडाहरू थिए। जहाज डुब्दा अधिकांश भेडाहरू मरे। मरेका भेडाहरूको कुल मूल्य ४ मिलियन डलर थियो । जहाजका सबै चालक दलका सदस्यहरू भने बाँच्न सफल भएका छन् ।

उक्त जहाज सुडानबाट साउदी अरबतर्फ जनावरहरू बोकेर गइरहेको थियो । जहाजमा क्षमताभन्दा बढी भेडाहरू भरिएको थियो ।

सुडानको बन्दरगाहका एक वरिष्ठ अधिकारीले नाम न छाप्ने सर्तमा जहाज आइतबार बिहान डुबेको बताए । यस जहाजमा १५ हजार ८ सय भेडाहरू थिए। जहाजमा क्षमताभन्दा धेरै भेडा भरिएको थियो।

जहाजमा नौ हजार भेडा मात्र बोक्ने क्षमता भए पनि १५ हजार ८ सय भेडा ओसारपसार भइरहेको अधिकारीले बताए । अर्का एक अधिकारीले घटनाको आर्थिक र वातावरणीय प्रभावको बारेमा चिन्ता व्यक्त गरे। दुर्घटनामा चालक दलका सबै सदस्यको उद्धार गरिएको उनले बताए ।

यो जहाज डुब्दा बन्दरगाहको सञ्चालन प्रभावित हुने अधिकारीले बताए । ठूलो संख्यामा जनावरको मृत्युले वातावरणमा पनि असर पार्न सक्छ। राष्ट्रिय निर्यात संघका प्रमुख ओमार अल खलिफाले जहाज डुब्न धेरै घण्टा लागेको बताए । यसको मतलब भेडाहरूलाई बचाउन सकिन्थ्यो।

संघको पशुचौपाया विभागका प्रमुख सालेह सेलिमले मरेका चौपायाको कुल मूल्य ४ मिलियन डलर रहेको बताए । ती भेडाहरू सुक्विन बन्दरगाहमा जहाजमा लोड गरिएको उनले बताए।

उनका अनुसार गाईवस्तु मालिकले करिब सात सय भेडा मात्र जिउँदो अवस्थामा फेला पारेका छन् तर अवस्था निकै नाजुक छ । उनले ती भेडाहरू बाँच्छन् भन्ने आफूहरूलाई नलागेको बताए । सेलिमले घटनाको छानबिन गर्न माग गरेका छन् ।

गत महिना सुआकिन बन्दरगाहको कार्गो क्षेत्रमा भीषण आगलागी भएको थियो, जुन धेरै घण्टासम्म नियन्त्रणमा आउन सकेको थिएन। यसले ठूलो क्षति पनि गरेको छ । आगलागीको कारण खुल्न सकेको छैन । आगलागीको कारण पत्ता लगाउन अनुसन्धान थालिएको छ ।

सुआकिन एक ऐतिहासिक बन्दरगाह हो जुन कुनै समय प्रमुख विदेशी व्यापार केन्द्र थियो। सुडान लामो समयदेखि आर्थिक संकटसँग जुधिरहेको छ । गत वर्ष सेना प्रमुख अब्देल फताह अल बुरहानको नेतृत्वमा भएको सैनिक विद्रोहपछि संकट गहिरिँदै गएको छ ।