काठमाडौं । भूकम्पपछि जताततै विनाशको दृश्य, भग्नावशेषमा दबिएको जीवन, आँखामा आँसु र हरेक आवाजमा आफन्तजनको आश । टर्की र सिरियामा गएको विनाशकारी भूकम्पका कारण २४ हजारभन्दा बढीको ज्यान गएको छ भने अझै धेरै भग्नावशेषमा दबिएको आशंका गरिएको छ ।

फेब्रुअरी ६ को बिहान भूकम्प गएको अहिले सम्म ५ दिन बितिसकेको छ । त्यसयता जारी उद्धार कार्यमा उद्धारकर्ताले मानिसलाई खोजेर बाहिर निकाल्ने अवस्था कस्तो छ भन्ने सोच्दा पनि आत्मा काँपिरहेको छ । धेरै दिनदेखि भोक, तिर्खा र हिँडडुल गर्न नसक्ने अवस्थामा उद्धारकर्मी नजिकै पुगेको देखेर पीडितको आँखामा बाँच्ने आशा पलाइरहेको छ । खुसीले रोइरहेका छन् ।

‘इन्शाअल्लाह’ जप्दै भग्नावशेषमुनि पसे र १० दिनकी नवजातलाई निकाले

यहाँ भूकम्प गएको ९० घण्टापछि उद्धारकर्मीले भग्नावशेषबाट १० दिने शिशु र आमालाई चमत्कारिक ढंगले निकालेका छन् । दक्षिणी प्रान्त हातेको क्षतिग्रस्त भवनबाट यागिज उल्स नामकी १० दिनको बालिकाको उद्धार गरिएको छ ।

बिस्तारै ‘इन्शाल्लाह’ भन्दै उद्धारकर्मीले होसियारीपूर्वक भग्नावशेषमुनि पुगेर बालिकालाई बाहिर निकालेर आफ्नो टोलीका सदस्यहरूलाई सुम्पे। बच्चालाई तुरुन्तै थर्मल कम्बलमा बेरेर समन्दग शहरको मेडिकल फिल्ड सेन्टरमा लगियो। टर्कीको प्रकोप एजेन्सीको एक भिडियोमा कामदारहरूले उनकी आमालाई स्ट्रेचरमा बोकेकी देखाइएको थियो, जो आंशिक रूपमा सचेत थिइन्।

एक सय १ घण्टापछि एकै परिवारका ६ जनालाई बाहिर निकालियो

यसबाहेक ५ दिन बितिसक्दा पनि धेरै ठाउँमा चमत्कारी ढंगले उद्धार गरिएको छ । उद्धारकर्मीहरूका अनुसार हाते प्रान्तको इस्कन्दरुनमा भत्किएको भवनबाट एकै परिवारका छ जनालाई बाहिर निकालिएको छ। यी मानिसहरू १०१ घण्टासम्म अलपत्र परेका थिए।

मानव साङ्लो बनाएर २ वर्षीय बालकको उद्धार

इस्केन्डरुन नजिकैको नूरदागीमा, एक स्पेनी उद्धारकर्मीले एक दुई वर्षीय बालकलाई भग्नावशेषबाट बाहिर निकाले, “मैले उसलाई पाएँ, मैले उसलाई पाएँ, जाऔं” भन्दै। त्यसपछि स्पेनिस मिलिटरी इमर्जेन्सी युनिट (युएमई) का सैनिकको टोलीले बच्चालाई न्यानो पालमा लैजान मानव साङ्लो बनाएर त्यहाँ सकुशल ल्यायो। केही समय पछि, तिनीहरूले उनकी छ वर्षीया दिदी एलिफ र त्यसपछि उनकी आमालाई पनि उद्धार गरे।

भग्नावशेषमा दबिएका युवकको रोदन ड्रिलभन्दा चर्को

अर्को पक्की भवनको तल अर्को जवान केटाको भयभीत अनुहार देखा पर्‍यो, उनलाई बचाउन खोज्ने ड्रिल र ग्राइन्डरको आवाज भन्दा उनको रोएको आवाज चर्को थियो । भूकम्प गएको १०३ घण्टापछि उनीसँगै उनकी आमाको पनि उद्धार गरिएको थियो ।

मृत आमाको नालसँग जोडिएको नवजात शिशुको उद्धार

तीन दिन अघि, सिरियाली मिडियाले एक गर्भवती महिला विनाशकारी भूकम्पको समयमा आफ्नो घरको भग्नावशेषमा फसेको र सुत्केरी भएको रिपोर्ट गरेको थियो। भग्नावशेषमै महिलाले बच्चालाई जन्म दिइन् । चिकित्सकको सहयोगमा बालकलाई सकुशल बाहिर निकालिए पनि आमालाई बचाउन सकिएन । बच्चा फेला पर्दा आमाको शरीरमा नालले जोडिएको थियो ।