काठमाडौं । अमेरिकी लडाकु विमानले आफ्नो देशको सिमानामा अर्को उड्ने वस्तु अर्थात् फ्लाइङ ससरलाई खसालेको छ । अमेरिकाले आफ्नो देशको आकाशमा देखेको उडिरहेको वस्तुलाई गत सातामा खसालेको यो चौथो पटक हो ।

अमेरिकी राष्ट्रपति जो बाइडेनले यो आदेश दिएपछि सोमबार बिहान क्यानडाको सीमा नजिक हुरोन तालमा लडाकु विमानहरूले यो उड्ने वस्तुलाई खसालेका थिए।

२० हजार फिटको उचाइमा उड्ने यो वस्तुले व्यावसायिक हवाई यातायातमा अवरोध ल्याउन सक्ने अमेरिकाले जनाएको छ ।

यस्तै एउटा वस्तु शनिबार मोन्टाना नजिक पनि देखिएको थियो । रक्षा अधिकारीहरूका अनुसार उक्त वस्तु मानवरहित थियो र यसले कुनै सैन्य खतरा उत्पन्न गरेको थिएन।

यो वस्तुलाई एफ-१६ लडाकु विमानले खसालेको हो। यसअघि फेब्रुअरी ४ मा अमेरिकाको आकाशमा एउटा बेलुन देखिएको थियो, जसलाई अमेरिकी सरकारले चीनको जासुसी बेलुन भनेको थियो ।

यस बेलुनका बारेमा चीनले यो मौसमको जानकारी सङ्कलन गर्न पठाइएको बेलुन भएको बताएको थियो, जुन बाटो हराएको थियो।

बेलुन मुद्दामा अमेरिका र चीनबीच तनाव बढेको थियो र अमेरिकी विदेशमन्त्री एन्टोनी ब्लिन्केनले आफ्नो चीन भ्रमण रद्द समेत गरेका थिए ।

प्रारम्भिक निगरानीपछि अमेरिकाले यो बेलुनलाई पनि निशाना बनाएर खसालेको थियो ।

यो घटना बाहिर आएपछि पनि त्यस्ता तीनवटा अवसर आए, जब आकाशमा देखेको वस्तुलाई अमेरिकाले आफ्नै देशमा गोली हानेको थियो ।

यद्यपि अधिकारीहरूले अहिलेसम्म यी वस्तुहरू कहाँबाट आएका थिए र तिनीहरूको उद्देश्य के थियो भनेर बताएको छैन । यो पत्ता लगाउन अमेरिका र क्यानडा दुवै काम गरिरहेका छन्।