काठमाडौं । पाकिस्तानमा चालू वर्षको पहिलो छमाहीमा औसत मुद्रास्फीति ३३ प्रतिशतसम्म पुग्न सक्छ। मुडीज एनालिटिक्सका एक वरिष्ठ अर्थशास्त्रीले समाचार एजेन्सी रोयटर्सलाई भनेका छन् कि पाकिस्तानमा बढ्दो मुद्रास्फीतिको प्रवृत्ति र विदेशी मुद्रा सञ्चिति संकटलाई ध्यानमा राख्दै आईएमएफको बेलआउट प्याकेज पनि अर्थव्यवस्थालाई संकटबाट बाहिर निकाल्न अपर्याप्त छ।

मूडीज एनालिटिक्सका वरिष्ठ अर्थशास्त्री क्याट्रिन आइलले भने, “आईएमएफको बेलआउट प्याकेजले मात्र अर्थतन्त्रलाई संकटबाट निकाल्ने आशा गर्न सकिँदैन। पाकिस्तानको अर्थतन्त्रलाई निरन्तर ठोस व्यवस्थापन चाहिन्छ।”

उनले भने, ‘पक्कै पनि पाकिस्तानको अगाडिको यात्रा निकै कठिन छ । तर, सरकारले २०२४ मा वित्तीय तथा मौद्रिक नीतिलाई कडाइका साथ राख्ने हाम्रो अपेक्षा छ ।’

पाकिस्तान अहिले गहिरो आर्थिक संकटमा फसेको छ । गत वर्ष जनवरीदेखि जनवरी २०२३ सम्म खुद्रा मुद्रास्फीति दर २७ दशमलव ५ प्रतिशत पुगेको छ ।

पाकिस्तानको विदेशी मुद्रा सञ्चिति निरन्तर घटिरहेको छ । फेब्रुअरी ३ गतेको सातामा २ अर्ब ९१ करोड मात्रै थियो । तर अबको केही महिनामा उसले साँवा ऋण र ब्याज सहित ९ अर्ब डलर तिर्नुपर्नेछ ।

पाकिस्तानी रुपैयाँको भाउ लगातार ओरालो लाग्दै गएको र यसका कारण उसको अगाडि ऋणको पहाड खडा भएको छ ।

हाल पाकिस्तान र आईएमएफबीच बेलआउटका लागि कुनै सम्झौता भएको छैन। यो सम्झौता पाकिस्तानलाई डिफल्टबाट बचाउन आवश्यक छ। तर यस विषयमा सहमति जुट्न सकेको छैन ।

पाकिस्तानले आईएमएफबाट १.१ बिलियन डलरको बेलआउट प्याकेज पाउने थियो। बेलआउट प्याकेजको यो भाग २.५ बिलियन डलरको प्याकेजको भाग हो जुन २०१९ मा आईएमएफ र पाकिस्तान बीच सहमति भएको थियो।

आईएमएफले पाकिस्तानको अर्थतन्त्रमा धेरै संरचनात्मक सुधार गर्न आग्रह गरेको छ। यसमा तेल, ग्यास र बिजुलीको मूल्य बढाउन भनिएको छ । आईएमएफको अडानलाई हेरेर पाकिस्तानमा प्राकृतिक ग्यासको मूल्य बढेको छ । आईएमएफले पनि केही नयाँ कर लगाउन माग गरिरहेको छ