काठमाडौं । चिनियाँ सेनाले बिहीबार अमेरिकी युद्धपोतले दक्षिण चीन सागरमा अवैध रूपमा घुसपैठ गरेको दाबी गरेको छ । उनका अनुसार पारासेल टापु नजिक भएको यो घटनापछि उक्त युद्धपोतलाई भगाइएको थियो ।

समाचार एजेन्सी रोयटर्सले चिनियाँ सेनालाई उद्धृत गर्दै गाईडेड मिसाइल प्रहार गर्ने युएसएस मिलियस जहाजले क्षेत्रको शान्ति र स्थायित्वलाई बेवास्ता गर्दै चीनको क्षेत्रीय जलक्षेत्रमा प्रवेश गरेको जनाएको छ।

“थिएटर फोर्सले सधैं उच्च सतर्कता कायम राख्नेछ र दक्षिण चीन सागरमा देशको सार्वभौमसत्ता, सुरक्षा, शान्ति र स्थायित्व कायम गर्न आवश्यक कदम चाल्नेछ,” चीनको साउथ थिएटर कमाण्डका प्रवक्ता तियान जुनलीले भने।

तर, अमेरिकी नौसेनाले चिनियाँ सेनाको भनाइभन्दा फरक मत राख्दै आफ्नो राय दिएको छ । अमेरिकी नौसेनाको सेभेन्थ फ्लीटले एक विज्ञप्तिमा आफ्नो जहाज दक्षिण चीन सागरमा “नियमित मिसन” मा रहेको र त्यसलाई खाली नगरिएको बताएको छ।

उसले भनेको छ कि अमेरिकाले अन्तर्राष्ट्रिय कानूनले अनुमति दिएको ठाउँमा उडान र जहाज जारी राख्नेछ। यो घटनापछि दुई देशबीच तनाव बढेको छ ।