काठमाडौं । इजिप्टका राष्ट्रपति अब्देल फताह अल–सिसी सोमबार बिहान साउदी अरेबिया पुगेका छन् । साउदी अरेबियाका युवराज र प्रधानमन्त्री मोहम्मद बिन सलमान जेद्दाह विमानस्थलमा अल-सिसीको स्वागत गर्न उभिएका थिए ।

अल-सिसी र साउदी अरेबियाका युवराजबीच रमजानको सहरीको समयमा भेट भएको हो। दुई नेताले साउदी अरेबिया र इजिप्टबीचको द्विपक्षीय सम्बन्धको समीक्षा गरेका थिए। साउदीको आधिकारिक समाचार एजेन्सी एसपीएका अनुसार दुई नेताले भेटमा आपसी सहयोग बढाउने सहमति गरेका छन्।

इजिप्ट र साउदी अरेबियाका दुई नेताबीच समसामयिक क्षेत्रीय र अन्तर्राष्ट्रिय अवस्थाका साथै आपसी मुद्दाका बारेमा छलफल भएको थियो । अल-सिसी केहि घण्टा पछि गए। साउदी अरेबियाले लामो समयदेखि इजिप्टलाई आर्थिक सहयोग गर्दै आएको छ तर हालै साउदीले अब कसैलाई पनि बिना शर्त सहयोग नगर्ने संकेत गरेको छ ।

साउदीको यो निर्णयलाई इजिप्ट र पाकिस्तानका लागि झट्का मानिएको छ । अल-सिसीको भ्रमणलाई मध्यपूर्वका इस्लामिक देशहरूमा नयाँ सम्बन्ध कायम गर्ने नीतिसँग पनि जोडिएको छ। इरान र साउदी अरेबियाले कूटनीतिक सम्बन्ध पुनर्स्थापित गर्न लागेका छन् । सिरियाका राष्ट्रपति बसर अल असदले युएईको भ्रमण गरेका छन् । रोयटर्सका अनुसार बशर अल असदले साउदीको पनि भ्रमण गर्न सक्नेछन् ।

अल सिसी सत्तामा आएदेखि साउदी अरेबिया र उसका खाडी सहयोगीहरूले इजिप्टलाई धेरै पटक सहयोग गरेका छन्। अल-सिसी मुस्लिम ब्रदरहुडका मोहम्मद मुर्सीलाई अपदस्थ गरेर एक दशकअघि सत्तामा आएका थिए।

युक्रेनमा रुसले आक्रमण गरेपछि इजिप्ट आर्थिक संकटसँग जुधिरहेको छ । तर साउदी अरेबिया, युएई र कतारले इजिप्टलाई हरेक कठिनाइबाट बाहिर निकाल्दै आएका छन् । गत वर्षको डिसेम्बरमा नै इजिप्टले अन्तर्राष्ट्रिय मुद्रा कोषसँग तीन अर्ब डलर ऋण सम्झौता गरेको थियो ।