काठमाडौं । अमेरिकाका पूर्व राष्ट्रपति डोनाल्ड ट्रम्पले मंगलबार न्यूयोर्कको एक अदालतमा उपस्थित हुँदा ३४ वटा गम्भीर अपराधमा दोषी भएको आरोप अस्वीकार गरेका छन् ।

२०१६ को राष्ट्रपतीय चुनाव अभियानमा उनको मुख बन्द राख्न पोर्न स्टार स्टर्मी डेनियललाई पैसा तिरेको आरोपसँग सम्बन्धित आपराधिक मुद्दामा ट्रम्पको उपस्थिति भएको हो ।

यसअघि अमेरिकी पूर्व राष्ट्रपति डोनाल्ड ट्रम्पलाई औपचारिक रुपमा पक्राउ गरिएको थियो । अभियोग अघि ट्रम्पलाई प्रहरी हिरासतमा राखिएको थियो ।

अदालतले ट्रम्पविरुद्ध अर्को वर्ष सुनुवाइ सुरु गर्न सक्ने बताएको छ । जुन ८ सम्ममा प्रतिवादी पक्षले अदालतमा आफ्नो तर्क पेश गर्न सक्नेछ ।

उपस्थितिपछि ट्रम्पले फ्लोरिडास्थित आफ्नो निवासमा सञ्चारकर्मीलाई सम्बोधन गरेका थिए । यस क्रममा ट्रम्पले आफूविरुद्ध कुनै ठोस प्रमाण नभएको दोहोर्‍याए।

ट्रम्पले यो पनि भने कि “हाम्रो देश पतनतर्फ गइरहेको छ। संसार पहिले नै धेरै कारणले हामीमाथि हाँसिरहेको छ।”

ट्रम्पले भने, “मैले एउटा मात्र अपराध गरेको छु, र त्यो हो मेरो देशलाई नष्ट गर्न चाहनेहरूबाट निडरताका साथ बचाउनु।”

डोनाल्ड ट्रम्पले ड्यानियलसँगको आफ्नो कथित सम्बन्धको बारेमा मौन रहन नियमहरूको उल्लङ्घन गर्दै २०१६ मा राष्ट्रपति चुनाव अभियानको क्रममा स्टर्मी डेनियललाई १ लाख ३० हजार डलर तिरेको आरोप छ।

आपराधिक मुद्दामा मुद्दाको सामना गर्ने ट्रम्प पहिलो अमेरिकी राष्ट्रपति हुन्।