काठमाडौं । साउदी अरबमा नेपाललगायत धेरै देशका लाखौं आप्रवासीहरू बस्छन्। जसका कारण साउदी अरेबियाबाट हरेक दिन हजारौं मानिसहरु अन्य देशमा जाने गर्छन् वा ती देशबाट साउदी अरेबिया आउने गर्छन् ।

अब यी व्यक्तिहरूलाई साउदी अरबमा निश्चित प्रक्रियाबाट गुज्रनुपर्नेछ। यद्यपि, यो प्रक्रिया तब मात्र लागु हुनेछ जब यात्रुसँग ६० हजार साउदी रियाल नगद वा सुन चाँदी जस्ता महँगो धातुका वस्तुहरू हुनेछन्।

साउदी अरेबियाको भन्सार विभागले अब साउदी अरेबिया छाड्दा वा त्यहाँ प्रवेश गर्नुअघि विदेशी यात्रुसँग ६० हजार रियालभन्दा बढी नगद वा सामान भएमा साउदी भन्सार विभागलाई जानकारी दिन आग्रह गरेको छ । यसो नगरेमा यात्रुले चर्को जरिवाना तिर्नु पर्ने हुन्छ ।

साउदी अरेबिया सरकारको जकात, कर र भन्सार प्राधिकरण (जेडटीसीए) ले आफूसँग रहेको नगद वा अन्य सामानको सही जानकारी नदिने यात्रुले आफ्नो सामान जफत गर्दा त्यसको २५ प्रतिशत जरिवाना तिर्नुपर्ने बताएको छ । यदि कसैले दोस्रो पटक यस्तो गरेको पाइएमा आफ्नो नगद वा सामानको कुल मूल्यको ५० प्रतिशत जरिवाना तिर्नुपर्नेछ ।

बरामद गरिएको सामान वा नगदको कुनै अपराध वा सम्पत्ति शुद्धीकरणसँग सम्बन्ध रहेको पाइएमा साउदी अरबको सम्पत्ति शुद्धीकरण ऐन अन्तर्गत कारबाही गरिने छ। सबै यात्रुहरूले आफ्नो नगद र सामान विवरण जेडटीसीए एप वा आधिकारिक वेबसाइट मार्फत साउदी अरेबियाको प्रवेश वा निकास बिन्दुमा आइपुग्नु अघि दर्ता गर्न सक्छन्। यसबाहेक विमानस्थलमा रहेको भन्सार विभागको कार्यालयमा पनि सम्पर्क गर्न सकिनेछ ।

साउदी अरेबियाको जकात, कर र भन्सार प्राधिकरणले ६० हजारभन्दा बढी साउदी रियाल नगद, महँगो सामान वा सो बराबरको विदेशी मुद्रा भएका सबैका लागि यो प्रक्रिया आवश्यक रहेको बताएको छ ।