काठमाडौं । इजरायलले संयुक्त राष्ट्र संघका विज्ञहरूले गाजाको अवस्थालाई लिएर चरमपन्थी संगठन हमासको प्रचार दोहोर्याएको आरोप लगाएको छ।

सात संयुक्त राष्ट्र-निर्देशित मानवअधिकार विशेषज्ञहरूले गाजाका नागरिकहरू ‘नरसंहार’ को जोखिममा रहेको र यसलाई रोक्नको लागि समय सकिन लागेको बताएका छन्। यो विशेष समूहले इजरायलले गाजा पट्टीलाई ‘नष्ट’ गर्ने योजना बनाएको आरोप लगाएको छ।

समूहले इजरायल र उसका सहयोगीहरूलाई तत्काल युद्धविरामको लागि अपील गरेको छ र हमासलाई बन्धक बनाएका सबैलाई रिहा गर्न आग्रह गरेको छ।

संयुक्त राष्ट्रसंघीय उच्चायुक्तको कार्यालयले जारी गरेको विज्ञप्तिमा गाजाको अवस्थाले भयावह मोड लिएको उल्लेख गरिएको छ ।

समाचार एजेन्सी रोयटर्सका अनुसार संयुक्त राष्ट्रका महासचिव एन्टोनियो गुटेर्रेसका प्रवक्ता स्टेफेन डुजारिकले भने कि यो ‘नरसंहार’ हो वा होइन भनेर संयुक्त राष्ट्रको न्यायिक निकायले मात्र निर्णय गर्न सक्छ।