काठमाडौं । इजरायली सेनाले आक्रमण गरेपछि दक्षिणी गाजामा रहेको सबैभन्दा ठूलो अस्पतालले काम गर्न बन्द गरेको विश्व स्वास्थ्य संगठनले जनाएको छ ।

विश्व स्वास्थ्य संगठनका प्रमुख डा. टेड्रोस अधानोम गेब्रेयससले डब्लुएचओको टोलीलाई खान युनुस सहरको नासेर अस्पतालमा प्रवेश गर्न नदिइएको बताएका छन् ।

यस अस्पतालमा अहिले पनि करिब २ सय बिरामी भर्ना छन् । डब्ल्यूएचओको टोलीले उनीहरूको अवस्थाबारे जानकारी लिन चाहेको थियो।

इजरायलले यो अस्पताल र वरपरका क्षेत्रमा गरिएको सैन्य कारबाहीमा २० भन्दा बढी हमास लडाकु मारेको बताएको छ । इजरायली सेनाले ठूलो परिमाणमा हतियार बरामद गरेको दाबी गरेको छ ।

इजरायली सेनाले हमास लडाकुहरूसँगको भिडन्तमा ट्याङ्क र लडाकु विमानको पनि प्रयोग भइरहेको जनाएको छ।

इजरायली सेनाले बिहीबार नासेर अस्पतालमा अपरेशन सुरु गरेको थियो। इजरायली सेनाले अस्पतालमा बन्धकहरू राखिएको बारे गुप्तचर जानकारी प्राप्त गरेको बताएको थियो।