काठमाडौं । अमेरिकी राष्ट्रपति जो बाइडेनको कुकुर ‘ कमाण्डर ’ ले कम्तिमा २४ पटक अमेरिकी गुप्तचर निकायका एजेन्टलाई टोकेको छ । भर्खरै सार्वजनिक भएका कागजातमा यो जानकारी आएको हो ।

जसका कारण सेक्रेट सर्भिसले आफ्नो रणनीति परिवर्तन गर्नुपरेको एक वरिष्ठ एजेन्टले जानकारी दिएका छन् । यस अन्तर्गत एजेन्टहरूलाई कुकुरबाट दूरी राख्न सल्लाह दिइयो।

यो चेतावनी ‘कमाण्डर’लाई ह्वाइट हाउसबाट बाहिर निकाल्नुभन्दा महिनौं अघि जारी गरिएको थियो।

सूचनाको अधिकार ऐन अन्तर्गत जारी गरिएका यी कागजातहरूका अनुसार यो जर्मन शेफर्ड जातको कुकुरले अक्टोबर २०२२ र जुलाई २०२३ को बीचमा कम्तीमा २४ पटक गोप्य सेवामा काम गर्ने सुरक्षाकर्मीलाई टोकेको थियो।

यसमा धेरै एजेन्टको नाडी, हात, कुहिनो, कम्मर, छाती, तिघ्रा र काँधमा चोट लागेको छ । यसमा गोप्य सेवा एजेन्टहरू समावेश भएका केसहरू मात्र समावेश छन्। बाँकी ह्वाइट हाउस स्टाफको केस यसमा समावेश गरिएको छैन।

बाइडेन परिवारको यो कुकुरलाई गत अक्टोबरमा मात्र ह्वाइट हाउसबाट बिदाइ गरिएको थियो। त्यसको एक साताअघि एक गुप्तचर एजेन्टले कुकुरको टोकाइबाट उपचार गराउनुपरेको थियो ।

गत जुनमा एउटा कुकुरले एजेन्टको हातमा यति गहिरो टोक्यो कि उनलाई टाँका लगाउनुपर्ने भयो। जसका कारण भुइँमा रगत फैलियो र ह्वाइट हाउसको पूर्वी भाग २० मिनेटसम्म बन्द गर्नुपरेको थियो ।

जुलाईमा पनि अर्का एजेन्टलाई कुकुरले टोकेपछि उसलाई पनि ६ वटा टाँका लगाइएको थियो ।