काठमाडौं । अमेरिकी विदेशमन्त्री एन्टोनी ब्लिन्केनले बीबीसीसँग कुरा गर्दै गाजाको २० लाख जनसंख्या “गम्भीर खाद्य संकट” को जोखिममा रहेको बताएका छन् ।

इजरायल-हमास युद्ध सुरु भएयता गाजाको सम्पूर्ण जनसंख्याको लागि यस्तो बयान आएको यो पहिलो पटक हो ।

गाजामा कार्यरत संयुक्त राष्ट्रसंघीय निकायहरूले मे महिनासम्म युद्ध नरोकिए र आवश्यक मात्रामा राहत सामग्री गाजामा नपुगेमा गाजाले ठूलो भोकमरीको सामना गर्नुपर्ने बताएको छ ।

एन्टोनी ब्लिन्केन हाल फिलिपिन्सको भ्रमणमा छन् । अमेरिकी अधिकारीहरूले मङ्गलबार आफूहरू छिट्टै मध्यपूर्वको भ्रमण गर्न लागेको बताएका छन्।

अक्टोबरमा हमासमाथि इजरायलले गरेको आक्रमणपछि ब्लिन्केनको यो छैटौं मध्यपूर्व भ्रमण हो। भ्रमणका क्रममा उनले युद्धविराम लम्ब्याउने सम्भावनाबारे छलफल गर्नेछन् ।

मंगलबार, कतारमा इजरायली मध्यस्थकर्ताहरूले फेरि एक पटक सम्भावित युद्धविरामको बारेमा छलफल गरिरहेका छन्। उक्त छलफलमा गाजामा राहत सामग्री पुर्‍याउनेदेखि लिएर हमासद्वारा बन्धक बनाएका इजरायलीहरूलाई रिहा गर्ने सबै कुरा समेटिनेछ।