काठमाडौं । उत्तर कोरियाले बिहीबार १० वटा ब्यालेस्टिक मिसाइल परीक्षण गरेको छ । समाचार एजेन्सी एपीका अनुसार यो परीक्षण पूर्वी सागर (जापान सागर) मा गरिएको थियो। दक्षिण कोरिया र जापानका सेनाले पनि यसको पुष्टि गर्दै कडा निन्दा गरेका छन् ।

अलजजीराका अनुसार बिहीबार बिहान ६.१४ बजे उत्तर कोरियाको सुनान क्षेत्रबाट मिसाइल प्रक्षेपण गरिएको थियो । दक्षिण कोरियाका ज्वाइन्ट चिफ अफ स्टाफले यी मिसाइलहरू करिब ३५० किलोमिटरको दुरी पार गरेपछि समुद्रमा खसेको बताए ।

दक्षिण कोरियाको सेनाले उत्तर कोरियाको यो कदम कोरियाली प्रायद्वीपको सुरक्षा र शान्तिका लागि खतरा भएको जनाएको छ । सेनाले प्रशान्त महासागरमा निगरानी बढाएको छ। उसले अमेरिका र जापानलाई मिसाइलका बारेमा थप जानकारी आदान प्रदान गर्न पनि अपिल गरेको छ ।

यी मिसाइल प्रक्षेपण हुनुभन्दा ३ दिनअघि उत्तर कोरियाले आफ्नो दोस्रो जासुसी उपग्रह प्रक्षेपण गर्ने प्रयास गरेको थियो, जुन असफल भएको थियो । वास्तवमा, स्याटेलाइट बोकेको रकेट हावामा नै विस्फोट भयो। उत्तर कोरियाको भूउपग्रह प्रक्षेपण हुनु केही घण्टाअघि दक्षिण कोरियाले दुई देशको सीमा नजिक २० वटा लडाकु विमानसँग युद्धाभ्यास गरेको थियो ।