काठमाडौं । भारतीय क्रिकेट टोलीका पूर्व कप्तान तथा चेन्नई सुपर किंग्सका वर्तमान कप्तान महेन्द्र सिंह धोनीले इन्डियन प्रिमियर लिगबाट अझै सन्यास नलिने बताएका छन्।

एमएस धोनीको नेतृत्वमा रहेको टोली चेन्नई सुपर किंग्सले आइतबार गुजरात टाइटन्स विरुद्ध आईपीएलको यस सिजनको अन्तिम लिग खेल खेल्यो। यस सिजनको आईपीएलबाट सीएसके पहिले नै बाहिरिसकेको छ।

खेलपछि धोनीले भने, “हाम्रो सिजन राम्रो थिएन, तर यो एक उत्तम प्रदर्शन थियो। यस सिजनमा हाम्रो फिल्डिङ राम्रो थिएन, तर आज हामीले धेरै राम्रा क्याचहरू लिएका छौं।”

सन्यासको प्रश्नमा धोनीले भने, “मसँग निर्णय लिन ४-५ महिना छ, कुनै हतार छैन। शरीरलाई फिट राख्नु महत्त्वपूर्ण छ।”

“यदि क्रिकेटरहरूले आफ्नो प्रदर्शनको आधारमा सन्यास लिन थाले भने, तिनीहरूमध्ये केहीले २२ वर्षको उमेरमा सन्यास लिनेछन्। अब म रांची जान्छु र केही साइकल यात्राको आनन्द लिनेछु।”

उनले भने, “म अहिले सन्यास लिइरहेको छैन र म फेरि फर्किन्छु भनिरहेको पनि छैन। मसँग धेरै समय छ। म यसबारे सोच्नेछु र त्यसपछि निर्णय लिनेछु।”