काठमाडौं । गाजामा रहेका इजरायली बन्धक एभियाटर डेभिडको परिवारले हमासले ‘प्रचार अभियान’ को एक भागको रूपमा जानाजानी उनलाई भोकै राखेको आरोप लगाएको छ।

हमासले शनिबार एक भिडियो जारी गरेपछि डेभिडको परिवारको बयान आएको हो। यस भिडियोमा धेरै कमजोर डेभिडलाई साँघुरो र कंक्रीट सुरुङमा देखाइएको छ।

२४ वर्षीय डेभिडलाई ७ अक्टोबर २०२३ मा हमासले बन्धक बनाएको थियो। त्यसबेलादेखि उनी अझै पनि हमासको हिरासतमा छन्। दक्षिणी इजरायलमा एक संगीत महोत्सवको क्रममा डेभिडलाई बन्धक बनाइएको थियो।

“हामी हाम्रो प्यारो छोरा र भाइ एभियाटर डेभिडलाई गाजामा हमासको सुरुङमा जानाजानी र निन्दनीय रूपमा भोकै मरेको हेर्न बाध्य छौं – एक जीवित कंकाल, जिउँदै गाडिएको,” उनको परिवारले भन्यो।

डेभिडको परिवारले इजरायली सरकार र विश्व समुदायलाई ‘एभियाटरलाई बचाउन सम्भव भएसम्म सबै गर्न’ आग्रह गरेको छ।

हमासले जारी गरेको भिडियोमा एभियाटर डेभिडले यसो भन्दै गरेको सुनिन्छ, “मैले धेरै दिनदेखि केही खाएको छैन… मलाई पिउन पानी पनि पाउन धेरै गाह्रो भइरहेको छ।”